खुशखबर :चिपळूणात दिल्लीत गेलेल्या त्या तिघांचे रिपोर्ट निगेटीव्ह...

चिपळूण  (रत्नागिरी) : चिपळूण तालुक्यातील दोणवली येथे दिल्लीहून आलेल्या तिघांची कोरोना चाचणी करण्यात आली. चाचणीमध्ये ते तिघेही निगेटिव्ह आढळले आहेत. त्यामुळे आरोग्य विभागाने सुटकेचा श्‍वास घेतला आहे. तालुका वैद्यकीय अधिकारी डॉ. ज्योती यादव यानीही या वृत्ताला दुजोरा दिला.

दिल्ली येथे 12 मार्च रोजी तबिल जमातीचा राज्यस्तरीय मेळावा आयोजित करण्यात आले होता. या मेळाव्यासाठी चिपळूण तालुक्यातून तिघेजण गेले होते. ते तिघेही दोेणवली येथील असल्याची माहिती मिळाल्यानंतर तालुक्यात खळबळ उडाली होती. हे तिघे दिल्लीहून आल्यानंतर चिपळूण शहरात राहत होते. लॉकडाऊन झाल्यानंतर ते दोणवली येथील आपल्या घरी गेले. शुक्रवारी दुपारी आरोग्य यंत्रणेला याबाबतची माहिती मिळाली.

हेही वाचा-सिंधुदुर्ग प्रशासन एका गोष्टीतून चिंतामुक्त

आरोग्य विभागाने सोडला सुटकेचा श्‍वास

सांयकाळी आरोग्य विभागाचे अधिकारी दोणवली भागात गेले. त्या तिघांची कोरोना चाचणी करण्यात आली. त्यात ते तिघेही निगेटिव्ह आढळले. त्यामुळे आरोग्य विभागाने सुटकेचा श्‍वास घेतला. याबाबत माहिती देताना डॉ. यादव म्हणाल्या, आम्ही त्या तिघांची चाचणी घेतली त्यामध्ये निगेटिव्ह रिपोर्ट आला. तरीही आम्ही त्यांच्यावर लक्ष ठेवून आहोत. त्यांना आवश्यक त्या सूचना करण्यात आल्या आहेत. शक्य तो त्यांनी घराबाहेर पडू नये. नातेवाईकांमध्ये मिसळू नयेे अशाही सूचना केल्या आहेत. त्यांच्या संपर्कात येणार्‍यांनाही योग्य ती खबरदारी घ्यावी अशी सूचना आम्ही केली आहे.