कोकण टाकतंय सिनेसृष्टीच्या दिशेने पाऊल ; स्थानिक कलाकारांसाठी संधी

सकाळ वृत्तसेवा
Tuesday, 22 September 2020

कोकणात स्थानिक कलाकार मिळून कोकणातच सिनेसृष्टी निर्माण करण्याचा मानस असलेल्या या कलाकार मंडळींनी या निमित्तानं एक पाऊल पुढे टाकत आहेत 

रत्नागिरी : "कोकणातल्या झाकन्या" या वेबमालिकेतून जगभर पोचलेले आणि "ती आमच्या गावाची" मागच्या बेंचवर या वेब मालिकेतून वेगळ्या विषयावर भाष्य करणारे के. झेड प्रॉडक्‍शन व्यावसायिक कलाकृतीच्या निर्मितीकडे वळले आहे. कोकणात स्थानिक कलाकार मिळून कोकणातच सिनेसृष्टी निर्माण करण्याचा मानस असलेल्या या कलाकार मंडळींनी या निमित्तानं एक पाऊल पुढे टाकताना "दिव्यांग" या नव्या कलाकृतीचे चित्रीकरण तालुक्‍यात विविध गावात होणार आहे.

हेही वाचा - रत्नागिरीत रुग्णालयांची होणार चौकशी ;रुग्णांवर कोणते उपचार केले, किती केले बिल..? 

 

दिव्यांगची गोष्ट ही समाजात असलेल्या लोभी, विकृत आणि स्वार्थासाठी कोणत्याही थराला जाणाऱ्या मानसिकतेला लख्ख प्रकाशात आणते. पण सजग नागरिक म्हणून जबाबदारी चोख बजावणारेही अजून समाजात आहेत हेही दाखवते. अनेक गूढ रहस्यांनी भरलेली, चकित करणाऱ्या प्रसंगासोबत प्रेक्षकांना बांधून ठेवणारी ही एक थ्रिलर सस्पेन्स कथा आहे. मराठी वेबसिरीजमधील एक उत्तम भय-रहस्य कथा म्हणून निश्‍चितच ठसा उमटवील, असा विश्‍वास कलाकार व तंत्रज्ञ मंडळींना आहे.

दिव्यांग ही नवी कलाकृती नेटफ्लिक्‍स, एस. एक्‍स. प्लेअर यासारख्या कमर्शियल ओटीटी प्लॅटफॉर्मसाठी असणार आहे. यामध्ये जिल्ह्यातील स्थानिक कलाकार अभिनय आणि तांत्रिक अंग सांभाळत आहेत. रत्नागिरी, जाकादेवी, चवे, आगरनरळ या भागात या वेब मालिकेचे चित्रीकरण होणार आहे. दिव्यांगची पटकथा व दिग्दर्शन प्रदीप शिवगण यांची आहे. सागर कावतकर, किशोर कनोजिया सहाय्य करत आहेत. सचिन सावंत व शुभम वाडकर हे यांचे छायादिग्दर्शक आहेत. तर स्वप्नील जाधव, श्रेया जाधव, दीप्ती वहाळकर, सचिन गावणकर हे प्रॉडक्‍शनचे काम पाहत आहेत.

हेही वाचा - कोकणात शेतकरी उदासीन ; यंदा विमा संरक्षित क्षेत्रामध्ये घट 

 

स्थानिक कलाकारांसाठी संधी

स्थानिक कलाकारांना या क्षेत्रात काम मिळावे, उत्पन्न मिळावं यासाठीच दिव्यांग हे पहिले पाऊल आहे. व्यावसायिक ओटीटीसाठी तयार होणारी ही कोकणातील पहिली वेबसिरीज ठरेल. चित्रीकरणासाठी आधुनिक तंत्र वापरत आहोत. इथेच सिने-नाट्य इंडस्ट्री उभी राहावी, या दिशेने पाऊल असल्याचे प्रदीप शिवगण यांनी सांगितले.

 

संपादन - स्नेहल कदम 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: new actors in konkan start a new project of divyang in villages of konkan area in ratnagiri