Raigad News : सुरक्षेच्या दृष्‍टिकोनातून १६ जानेवारीपर्यंत रायगड जिल्ह्यातील औद्योगिक क्षेत्रात जमावबंदीचे आदेश

Raigad News : रायगड जिल्हा पोलिस कार्यक्षेत्रामध्ये रोहा (धाटाव), नागोठणे, खालापूर, खोपोली, रसायनी, माणगाव, महाड (बिरवाडी), अलिबाग या ठिकाणी मोठ्या प्रमाणावर औद्योगिक कारखाने आहेत.

कामगार संघटनांकडून अनेकदा विविध मागण्यांसाठी संप व आंदोलन पुकारण्यात येत असल्याने कायदा व सुव्यवस्थेचा प्रश्न निर्माण होत असतो. सुरक्षेच्या दृष्‍टिकोनातून रायगड जिल्हा पोलिस कार्यक्षेत्रात १६ जानेवारीपर्यंत वरिष्‍ठ‍ जिल्हादंडाधिकारी संदेश शिर्के यांनी प्रतिबंधात्मक आदेश जारी केला आहेत.

जिल्ह्यामध्ये बहुतांशी गावामध्ये हिंदू-मुस्लिम-बौद्ध तसेच इतर धर्मीयांची मिश्र लोकवस्ती आहे. अनेकदा वैयक्‍तिक कारणांवरून जातीय तेढ निर्माण होण्याची शक्‍यता असते. यावर उपाययोजना म्‍हणून प्रशासनाकडून जमाबंदीचे आदेश देण्यात आले आहेत.

यात शस्‍त्रे, तलवारी, भाले, बंदुका, सुरे, काठ्या, शारीरिक दुखापत होईल, अशी कोणतीही वस्तू बाळगणे, ज्‍वलनशील पदार्थ किंवा स्फोटक घेऊन फिरण्यास मनाई आहे. आक्षेपार्ह घोषणाबाजी, ज्‍यामुळे शांतता धोक्यात आणतील असे कृत्‍य करणाऱ्यांवरही पोलिसांची नजर आहे.

रायगड जिल्हा पोलिस कार्यक्षेत्रात पूर्व परवानगीशिवाय पाच अगर त्‍याहून अधिक व्यक्तीचा समावेश असलेल्या जमावास किंवा मिरवणुकीस मनाई करण्यात आली आहे. याबाबतच्या अधिसूचना संबंधित तहसीलदार तथा कार्यकारी दंडाधिकारी यांना देण्यात आल्‍या आहेत.