कोकण : राजापुरात बर्ड फ्लूमुळे पक्षी सर्वेक्षण होणार ; आठ पक्ष्यांचा मृत्यू

राजापूर (रत्नागिरी) : कोरोना विषाणूचे थैमान हळूहळू कमी होऊ लागलेले असताना बर्ड फ्लूचा ज्वर आता वाढू लागला आहे. राजापूर शहरासह तालुक्‍याच्या ग्रामीण भागामध्ये गेल्या काही दिवसांमध्ये आठ पक्षी मृतावस्थेमध्ये सापडले आहेत. त्यामध्ये सात कावळ्यांचा तर, एका कबुतर पक्ष्याचा समावेश आहे. मृतावस्थेमध्ये सापडलेले पक्षी वैद्यकीय तपासणी प्रयोगशाळेमध्ये पाठविण्यात आले असून, त्यांचा अद्यापही अहवाल आला नसल्याचे पशुधन विकास अधिकारी (विस्तार) डॉ. प्रमोद सुर्वे यांनी सांगितले. 

संभाव्य बर्ड फ्लू लक्षात घेवून पशुसंवर्धन विभागातर्फे तालुक्‍यात पक्षी सर्व्हेक्षणाचे काम हाती घेण्यात आल्याचे त्यांनी स्पष्ट केले. मृतावस्थेमध्ये सापडलेल्या पक्ष्यांपैकी काही पक्षी जास्त कुजलेल्या स्थितीमध्ये, तर काही पक्ष्यांची मान नसलेल्या स्थितीमध्ये होते. असे पक्षी वगळून उर्वरित पक्षी वैद्यकीय तपासणीसाठी प्रयोगशाळेमध्ये पाठविण्यात आल्याची माहिती डॉ. सुर्वे यांनी दिली.

हेही वाचा - १ फेब्रुवारी २०२१ पासून सर्व मतदारांना ही सेवा उपलब्ध होणार आहे

प्रयोगशाळेमध्ये वैद्यकीय तपासणीसाठी पाठविलेल्या या मृतावस्थेतील पक्ष्यांचा अद्यापही वैद्यकीय अहवाल प्राप्त झालेला नाही. संभाव्य बर्ड फ्लूला रोखण्यासाठी पशुसंवर्धन विभागातर्फे पोल्ट्रीधारकांशी संपर्क साधून योग्य ती खबरदारी घेण्याच्या सूचना देण्यात आल्या आहेत. बंदस्थितील पोल्ट्रीचे निर्जतुकीकरण करण्याच्या सूचना दिल्याचे डॉ. सुर्वे यांनी स्पष्ट केले.

...तर रेड झोन जाहीर

संभाव्य बर्ड फ्लूचा धोका लक्षात घेऊन त्याला तालुक्‍यात रोखण्यासाठी पशुसंवर्धन विभाग सज्ज असल्याचे पशुधन विकास अधिकारी (विस्तार) डॉ. प्रमोद सुर्वे यांनी सांगितले. पशुसंवर्धन विभागातर्फे तालुक्‍यात पक्षी सर्वेक्षणाचे काम हाती घेण्यात आले असून, मृतावस्थेतील सापडलेल्या पक्ष्याचा बर्ड फ्लू संसर्ग म्हणून वैद्यकीय अहवाल पॉझिटिव्ह आल्यास त्या गावामध्ये रेड झोन करण्याची तयारी प्रशासनाने केल्याचे डॉ. सुर्वे यांनी सांगितले.

संपादन - स्नेहल कदम