Raigad : महिला रुग्णासोबत असभ्य वर्तन; पोलिस ठाण्यात गुन्हा दाखल

Raigad - रसायनीतील रिस येथील रुग्णालयात उपचारासाठी आलेल्या महिलेसोबत तेथील डॉक्टरांनी अपमानास्पद वागणूक आणि अर्वाच्य भाषा वापरली होती. याप्रकरणी डॉ. बंग यांच्यावर कारवाई करण्यात यावी, या मागणीसाठी वासांबे मोहोपाडा आणि इतर बाजारपेठांत बुधवारी (ता. १२) बंद पाळण्यात आला. या वेळी वासांबे मोहोपाडा बाजारपेठेतून सर्वपक्षीयांनी रॅली काढली. दुपारी बारानंतर बंद शिथील करण्यात आला. दरम्यान डॉ. बंग यांच्याविरोधात रसायनी पोलिस ठाण्यात गुन्हा दाखल केला आहे.

रिस येथे राहणारी ३३ वर्षीय महिलेच्या तब्येतीत सुधारणा होत नसल्याने पीडितेचा भाऊ रेहान लांबतुरे यांनी डॉ. बंग यांच्याकडे शनिवारी विचारपूस केली. यावेळी मनात राग धरून डॉ. बंग यांनी शिवीगाळ व दमदाटी करून लांबतुरे यांना रुग्णालयाबाहेर काढले.

तसेच, पीडित रुग्ण महिलेसोबतही अपमानस्पद वागणूक आणि अर्वाच्य भाषा वापरली. रुग्णालयातून डिस्‍चार्ज दिल्यानंतर त्यांनी रसायनी पोलिस ठाण्यात तक्रार दाखल केली. याप्रकरणी पोलिस निरीक्षक शत्रुघ्न माळी यांच्या मार्गदर्शनाखाली अधिक तपास सुरू आहे.

दरम्यान डॉ. बंग यांच्यावर कारवाई करावी, याकरिता वासांबे मोहोपाडा, चांभार्ली, वावेघर परिसरात बंदचे आवाहन सर्व पक्ष, सामाजिक संघटना यांच्यातर्फे करण्यात आले होते. बुधवारी वासांबे मोहोपाडा येथे निदर्शने करण्यात आले.

यावेळी पोलिसांनी चोख बंदोबस्त ठेवला होता. माजी सरपंच ताई पवार, काँग्रेसचे कृष्णा पारंगे, अनंत दळवी, सागर सुखदरे, संतोष चौधरी, राष्ट्रवादीचे संदीप मुंढे, अनिल पिंगळे, दत्तात्रेय जांभळे, शेकापचे जगदीश पवार, ठाकरे गटाचे संतोष पांगत, मंगेश पाटील आणि इतर पक्षाचे पदाधिकारी उपस्थित होते.