Chameleon lizard : आफ्रिकेत दिसणारा शॅमेलियन जातीचा दुर्मिळ सरडा आढळला रत्नागिरीतील कनकाडीत!

साखरपा : कनकाडी येथे शॅमेलियन जातीचा दुर्मिळ सरडा (Chameleon lizard) आढळून आला आहे. बातमीदार अमित पंडित यांना दाभोळे-कनकाडी रस्त्यावर हा सरडा दिसला. तीन वर्षांपूर्वी हा सरडा कनकाडीतच काजूच्या बागेत आढळून आला होता.

पंडित रविवारी या रस्त्याने प्रवास करत असताना हा सरडा त्यांना रस्त्यावर चालताना दिसून आला. शॅमेलियन जातीचा हा सरडा अत्यंत दुर्मिळ समजला जातो. आफ्रिकेत (Africa) आढळणारा हा सरडा आपल्याकडे क्वचित दिसून येतो. साधारण सहा इंच लांब असलेला हा सरडा प्रामुख्याने झाडावर आढळून येतो.

हिरव्या रंगाचा असलेला हा सरडा, रंग बदलणारा सरडा म्हणून ओळखला जातो. ज्या झाडावर हा सरडा असतो त्या झाडाच्या पानाच्या रंगाप्रमाणे तो आपल्या रंगाची छटा बदलतो. सरड्याच्या गळ्यावर आणि पोटावर पांढऱ्‍या काट्यांची ओळ दिसून येते. या सरड्याची हालचाल अत्यंत संथ असते. त्यांनी रस्त्यावरची वाहतूक थांबवून सरड्याला रस्त्याकडेला घेऊन रानात सोडून दिले.