Video : शिवशाही चालकाला केली मारहाण अन् पुढे झालं असं...

गुहागर - अपघातानंतर खासगी गाडीतील प्रवाशांकडून शिवशाहीच्या चालकाला मारहाण झालेल्या प्रकरणी संबंधितांवर कडक कारवाईसाठी गुहागर आगारातील एसटी कर्मचाऱ्यांनी तीन तास काम बंद आंदोलन केले. पोलिसांनी दिलेल्या आश्‍वासनानंतर रात्री साडेआठला गुहागर आगारातून एसटी प्रवास सुरळीत झाला. अपघातास जबाबदारी खासगी गाडीच्या चालकाविरोधात पोलिसांनी गुन्हा दाखल केला असून, अधिक तपास सुरू आहे. 

गुहागर आगारातून मिळालेल्या माहिती नुसार, शनिवारी (ता. २९) गुहागर-पूणे (एमएच ०९ एफएल ०३९०) जादा शिवशाही बस ३ वाजता गुहागरमधून सुटली. ती पोफळी येथे सायंकाळी ५ वाजण्याच्या सुमारास पोचली. त्याचवेळी चिपळूणकडून येणाऱ्या खासगी चारचाकी वाहनाला जागा देण्याच्या प्रयत्नात दोन्ही गाड्या एकमेकाला घासल्या. खासगी गाडीत नाशिक येथुन आलेले ठेकेदार महावितरणमधील एका अधिकाऱ्याच्या निरोप समारंभाला पोफळी येथे आले होते. या प्रकारानंतर खासगी गाडीच्या चालकासह अन्य प्रवाशांनी शिवशाही चालक अमोल आण्णा पाटील यांना बसमधून खाली खेचून मारहाण केली. या मारहाणीत अमोल पाटील गंभीर जखमी झाले आणि ते बेशुद्ध पडले. त्यावेळी तिथे असलेल्या अन्य लोकांसह शिवशाहीचे वाहक आणि ग्रामस्थांनी चालक पाटील यांना खासगी रुग्णालयात दाखल केले; परंतु त्यांची स्थिती गंभीर असल्यामुळे त्यांना डेरवण येथे अधिक उपचारासाठी हलविण्यात आले. अपघाताची माहिती समजताच आगारप्रमुख राजेशिर्के हे घटनास्थळी पोचले.

आगारातील कर्मचाऱ्यांनी केले काम बंद आंदोलन 

खासगी चारचाकीचा चालक पोफळी पोलीस ठाण्यात दाखल झाला होता; मात्र त्या गाडीतील अन्य प्रवासी कार्यक्रमासाठी निघुन गेल्याची माहिती समजल्यानंतर संतापलेल्या गुहागर आगारातील कर्मचाऱ्यांनी सायंकाळी ५.३० नंतर काम बंद आंदोलन सुरु केले. गुहागर आगारातील कर्मचाऱ्यांनी चालकासह मारहाण करणाऱ्यांनाही अटक झाली पाहिजे, अशी मागणी केली. तसेच काम करताना आम्हाला सुरक्षा मिळाली पाहिजे, यासाठी 
काम बंद केले. 

आंदोलन साडेआठपर्यंत...

दरम्यान, हे आंदोलन साडेपाच ते साडेआठपर्यंत सुरू होते. गुहागर पोलिसांनी आगारात जाऊन या प्रकरणातील सर्वांना अटक केली जाईल, असे आश्‍वासन दिले. त्यानंतर आंदोलन मागे घेत गाड्या सुरू झाल्या. तोपर्यंत गुहागरमधून एकही गाडी सोडण्यात आली नव्हती. या प्रकरणी खासगी गाडीच्या चालकावर गुन्हा दाखल करण्यात 
आला आहे.