मोठ्या खर्चाला छेद : त्यांनी घेतला हा निर्णय़ अन् असा केला विवाह....

चिपळूण (रत्नागिरी) : कोरोनाच्या पाश्वभूमीवर लॉकडाऊन सुरू असल्याने वालोपे येथे रविवारी (ता. 10) सामाजिक नियमांचे पालन करीत अनोखा विवाह सोहळा पार पडला. चिपळूण पालिकेचे बांधकाम विभागाचे कर्मचारी प्रवीण सिद्धार्थ जाधव आणि मुसाड येथील दिशा सुनील सावंत यांनी नियोजित विवाह मोजक्याच नातेवाईकांसह थाटात केला. विशेष म्हणजे या नववधुवरांनी सामाजिक बांधिलकी जपत वालोपेतील 35 कुटूंबांना जीवनावश्यक वस्तूंचे वाटप केले. मोठ्या खर्चाला छेद देत तो खर्च सामाजिक कार्यासाठी वापरल्याने अनेकांनी या नववधूवरांचे कौतुक केले. 

नववधुवरांनी 35 कुटुंबांना दिल्या जीवनावश्यक वस्तू  

कोरोना संकटामुळे सर्वच नियोजित सार्वजनिक कार्यक्रम रद्द करण्याची वेळ आली आहे. प्रवीण आणि दिशा यांचा विवाह रविवारी (ता. 10) निश्‍चित झाला होता. मात्र कोरोनाचे संकट अधिकच गंभीर बनल्याने लॉकडाऊन वाढविण्यात आले. त्यामुळे या वधुवरांनी आपल्या कुटुंबीयांच्या संमतीने शासनाच्या आदेशाचे पालन करीत मोजक्याच नातेवाईकांसह विवाह करण्याचा निर्णय घेतला. त्यांनी मोठा खर्च टाळून 35 कुटुंबांना जीवनावश्यक वस्तूंचे वाटप केले. विशेष म्हणजे विवाह सोहळ्याला येऊ न शकलेल्या नातेवाईकांनी व्हिडीओ कॉलवर हा सोहळा पाहिला.

हेही वाचा- पुन्हा मुंबई रिटर्न; सिंधुदुर्ग जिल्ह्यात आणखी एक पाॅझिटिव्ह

पालिका कर्मचार्‍याचा विवाह साधेपणाने 

सहभागी झालेल्या प्रत्येकाने तोंडावर मास्क बांधून सोशल डिस्टन्सिंगचे पालन केले. सॅनिटायझरचाही वापर करण्यात आला. या वेळी वालोपेचे पोलिसपाटील बाळकृष्ण कदम, शाखेचे अध्यक्ष शांताराम जाधव, हरिश्‍चंद्र जाधव, सुनील मोहिते, अमोल जाधव, दिपेश जाधव,  पत्रकार शैलेश जाधव, सुभाष जाधव, विणा सावंत, प्रियंका जाधव, अरुणा जाधव आदी उपस्थित होते.

हेही वाचा-कोरोनाबाधित महिलांना मुंबईतून रत्नागिरीत आणणाऱ्या टेंपो चालकाचा शोध सुरू

कोरोनामुळे सुरू असलेल्या लॉकडाऊनमुळे विविध स्तरातील घटकांना मोठा फटका बसला आहे. लॉकडाऊन नसता तरा विवाहाला खर्च अधिक झाला असता. त्यामुळे वाचलेला खर्च गरजू लोकांसाठी करण्याचा निर्णय आम्ही कुटुंबीयांनी घेतला. त्यानुसार वाडीतील सर्व 35 कुटुंबांना जीवनावश्यक वस्तूंचे वाटप केले. 
---प्रवीण जाधव, वालोपे