बिअर न दिल्याने दुकानदाराला मारहाण करणाऱ्यांवर गुन्हे

बिअर न दिल्याने दुकानदाराला
मारहाण करणाऱ्यांवर गुन्हे

नांदगाव येथे पोलिसांची कारवाई

कणकवली,ता. ८ ः नांदगाव येथे एका बिअर शॉपी दुकानदारास मारहाण झाली. हा प्रकार आज मध्यरात्री दोनच्या सुमारास घडला. याप्रकरणी नादंगाव येथील दोघांवर गुन्हे दाखल करण्यात आले. केदार खोत आणि निलेश उर्फ गोट्या कोरगांवकर (दोन्ही रा.नांदगाव), अशी त्यांची नावे आहेत.
या प्रकरणी महेश भागुराम साळवी (वय ४४, रा. नांदगाव ओटव फाटा) यांनी पोलिसात फिर्याद दिली. यात म्हटले आहे की, संशयितांनी मध्यरात्री साडेबाराच्या सुमारास एका व्यक्तीला पाठवून केदार खोत यांनी बिअर आणण्यासाठी पाठवल्याचे सांगितले. यावेळी आपण त्यांना आता बिअर देणार नाही. उद्या सकाळी या आणि बियर घेऊन जा असे सांगितले. यावेळी दोन्ही संशयितांनी नांदगाव भवानी कॉम्प्लेक्स येथील राहत्या घरी आले आणि दरवाजा ठोठावून साळवी असे हाक मारू लागले. त्यानंतर आपली मुले बाहेर आली. थोड्याच वेळात आपणही दरवाजाजवळ आल्यानंतर दोघाही संशयितांनी मारहाण केली. दरम्यान, फिर्यादीवरून गुन्हा दाखल करून चौकशी सुरू केली आहे. कासार्डे पोलिस दूरक्षेत्राचे चंद्रकांत झोरे अधिक तपास करीत आहेत.