देवगडात उद्या डॉ. आंबेडकर अभिवादन रॅली

swt१२४.jpg
९५२७४
देवगडः येथे के. एस. कदम, दिलीप कदम यांनी पत्रकारांना माहिती दिली.

देवगडात उद्या डॉ. आंबेडकर अभिवादन रॅली
जयंती समितीचा उपक्रमः व्याख्यानासह विविध कार्यक्रमांचे आयोजन
सकाळ वृत्तसेवा
देवगड, ता. १२ः येथील देवगड जामसंडे शहरात शुक्रवारी (ता. १४) डॉ. बाबासाहेब आंबेडकर जयंती कार्यक्रमाचे आयोजन करण्यात आले आहे. यानिमित्ताने शुक्रवारी सायंकाळी ५ वाजता येथील महाविद्यालय नाका ते तहसीलदार परिसरातील प्रांगणापर्यंत अभिवादन रॅली काढण्यात येणार आहे. यानंतर होणाऱ्या अभिवादन सभेला अ‍ॅड. वैशाली डोळस ''शिवराय ते भिमराय'' या विषयावर संबोधित करणार आहेत, अशी माहिती आंबेडकर जयंती कार्यक्रम समितीचे अध्यक्ष के. एस. कदम, कार्यवाह दिलीप कदम यांनी दिली.
कार्यक्रमाच्या नियोजनासाठी येथे बैठक झाली. बैठकीनंतर पत्रकारांना माहिती देण्यात आली. यावेळी के. एस. कदम, दिलीप कदम यांच्यासह आनंद देवगडकर, प्रकाश जाधव, प्रा. श्रीकांत शिरसाठे, सूर्यकांत साळुंखे, प्रदीप कदम आदी उपस्थित होते. यावेळी कदम म्हणाले, येथील शहरात जयंती कार्यक्रम व्हावा, असा मतप्रवाह होता. हाच धागा पकडून डॉ. बाबासाहेब आंबेडकर जयंती कार्यक्रम समिती गठीत करून शुक्रवारी शहरात डॉ. बाबासाहेब आंबेडकर जयंती कार्यक्रमाचे आयोजन करण्यात आले आहे. या कार्यक्रमानिमित्त छत्रपती शिवाजी महाराज आणि डॉ. बाबासाहेब आंबेडकर यांच्या विषयी तालुक्यातील युवा पिढीला समजण्यासाठी अ‍ॅड. डोळस यांचे ''शिवराय ते भिमराय'' विषयावर व्याख्यान आयोजित केले आहे. शुक्रवारी सायंकाळी ५ वाजता महाविद्यालय नाका ते तहसीलदार परिसरातील प्रांगणापर्यंत अभिवादन रॅली काढली जाणार आहे. यावेळी ''आरंभ नव्या युगाचा'' हा भीमगीतांचा सांस्कृतिक कार्यक्रम होणार आहे. यावेळी होणाऱ्या अभिवादन सभेवेळी आमदार नीतेश राणे, देवगड जामसंडे नगराध्यक्षा साक्षी प्रभू, उपनगराध्यक्षा मिताली सावंत, परिविक्षाधिन तहसीलदार स्वाती देसाई, प्रभारी गटविकास अधिकारी अरुण चव्हाण उपस्थित राहणार आहेत. तालुकावासीयांनी जास्तीत जास्त संख्येने कार्यक्रमात सहभागी होण्याचे आवाहन समितीच्यावतीने करण्यात आले.