खेड ः खेडमध्ये सापडलेला ''तो'' तांदूळ प्लास्टिकचा नाही

खेडमधील ''तो'' तांदूळ प्लास्टिकचा नाही

भोस्तेतील प्रकाराची चौकशी ः तहसीलदारांकडून पाहणी
खेड, ता. १४ ः तालुक्यातील रास्त धान्य दुकान भोस्ते (तात्पुरते व्यवस्थापन निळीक) येथून वितरित करण्यात आलेल्या तांदळामध्ये प्लास्टिकचे तांदूळ आढळल्याचे पुढे आल्याने सर्वत्र खळबळ उडाली होती; मात्र, या प्रकरणी खेडच्या तहसीलदार प्राजक्ता घोरपडे यांनी तातडीने या रास्त धान्य दुकानात जाऊन तिथल्या तांदळाच्या नमुन्यांची पाहणी केली. या वेळी ते तांदूळ प्लास्टिकचे नसल्याचे निदर्शनास आले तसेच याबाबत तक्रार केलेल्यांचाही संभ्रम दूर झाला असून, तहसीलदार घोरपडे यांनी पुरवठा निरीक्षक व महसूल सहाय्यक यांच्यासह भेट दिली. मार्चमध्ये उचल केलेल्या तांदळापैकी शिल्लक साठ्याची तपासणी केली. अल्प प्रमाणात पांढऱ्या रंगाचे दाणे आढळले; तो प्लास्टिकजन्य तांदूळ नसल्याचे दिसले. त्यामुळे कुठलीच तक्रार नसल्याचा जबाब दिला असल्याची माहिती तहसीलदार प्राजक्ता घोरपडे यांनी दिली.
निळीक गावात हनुमान जन्मोत्सव भंडाऱ्यानिमित्त गावातील निळीक (मराठवाडी) येथील हनुमान मंदिरात ६ ला महाप्रसाद कार्यक्रम आयोजित करण्यात आला होता. त्यासाठी गावातील १० शिधापत्रिकाधारकांनी रास्त धान्य दुकान भोस्ते येथून घेतलेला तांदूळ महाप्रसादासाठी दिला होता. कार्यक्रमाची पूर्वतयारी करण्यासाठी गावातील काही महिला हा तांदूळ निवडत असताना तांदळामध्ये अल्प प्रमाणात पांढऱ्या रंगाचे तांदळाचे दाणे आढळून आले; परंतु हा तांदूळ नेहमीच्या तांदळापेक्षा थोडा फुगीर व चमकदार आढळला. त्यामुळे काही लोकांच्या मनात संभ्रम निर्माण झाला होता, असा जबाब शिधापत्रिकाधारकांनी लिहून दिला असून आता याबाबत तक्रार नसल्याचे नमूद केले आहे, असे तहसीलदार घोरपडे यांनी स्पष्ट केले आहे.

-