आचरा मासळी मार्केटमध्ये ‘वॉटर एटीएम’

55319
आचरा ः वॉटर एटीएमचे लोकार्पण करताना सरपंच जेरॉन फर्नांडीस, उपसरपंच संतोष मिराशी व अन्य.

आचरा मासळी मार्केटमध्ये ‘वॉटर एटीएम’

ग्रामपंचायतीकडून सुविधा ः अद्ययावत शौचालयाचेही लोकार्पण

सकाळ वृत्तसेवा
आचरा, ता. २ ः येथे मोठे मासळी मार्केट काही वर्षांपूर्वी सुरू करण्यात आले; मात्र पिण्यायोग्य शुद्ध पाणी आणि शौचालय उपलब्ध नसल्याने मासळी विक्रेत्या महिला व ग्राहकांना त्रास सहन करावा लागत होता. आचरा ग्रामपंचायतीने याची दखल घेऊन आचरा बाजारपेठ येथील मासळी मार्केटकडे वॉटर एटीएम व अद्ययावत शौचालय करून दिले आहे. याचे लोकार्पण सरपंच जेरॉन फर्नांडीस व उपसरपंच संतोष मिराशी यांच्या हस्ते करण्यात आले.
यावेळी ग्रामविस्तार अधिकारी प्रकाश कदम, ग्रामपंचायत सदस्य मुजफ्फर मुजावर, महेंद्र घाडी, पंकज आचरेकर, अनुष्का गावकर, किशोरी आचरेकर, चंद्रकांत कदम, हर्षदा पुजारे, श्रुती सांवत, व्यापारी संघटना अध्यक्ष वामन आचरेकर, खजिनदार जयप्रकाश परुळेकर, सचिन हडकर, बाळा घाडी, वीरू पुजारे, सुधा कोदे, गजू गावकर, लवू घाडी, उदय घाडी आदी ग्रामस्थ व व्यापारी उपस्थित होते. आचरा ग्रामपंचायतीद्वारे देण्यात आलेल्या वॉटर एटीएमद्वारे थंड पाणी व साधे पाणी अशा एकत्र दोन एटीएम सुविधा देण्यात आल्या आहेत. यामधून थंड पाणी एक रुपया ५०० मिली, दोन रुपया एक लीटर, दहा रुपयांमध्ये पाच लीटर व एटीएम कार्डद्वारे २० रुपयांमध्ये १८ लिटर पाणी मिळणार आहे. साधे शुद्ध पाणीही उपलब्ध असणार आहे. ज्यांना नियमित पाणी आवश्यक आहे, त्यांच्यासाठी एटीएम कार्डची शुल्क घेऊन सुविधा उपलब्ध करण्यात आली आहे. त्यामुळे मासळी विक्रेते, ग्रामस्थ व व्यापारी वर्गाला शुद्ध मुबलक पाणी उपलब्ध होणार असून, याबाबत त्यांच्याकडून समाधान व्यक्त होत आहे.