चं. प्र. देशपांडेंना आरती प्रभू पुरस्कार

60914
चं. प्र. देशपांडे, शरद भुताडिया

चं. प्र. देशपांडेंना आरती प्रभू पुरस्कार

केदार सामंत ः कुडाळमध्ये ४ फेब्रुवारीला वितरण

सकाळ वृत्तसेवा
कुडाळ, ता. २७ ः आरती प्रभू पुरस्कार २०२४ चा पुरस्कार पुणे येथील ज्येष्ठ नाटककार चं. प्र. देशपांडे यांना देण्यात येणार आहे. हा पुरस्कार वितरण सोहळा ४ फेब्रुवारीला सायंकाळी ६.३० ला एकनाथ ठाकूर सभागृह, संत राऊळ महाराज महाविद्यालय, कुडाळ येथे होणार आहे. पुरस्काराचे वितरण अभिनेते डॉ. शरद भुताडिया यांच्या हस्ते करण्यात येणार आहे, अशी माहिती बाबा वर्दम थिएटर्सचे कार्यवाह केदार सामंत यांनी दिली.
संत राऊळ महाराज कॉलेज येथे पत्रकार परिषद घेण्यात आली. संस्थेचे पदाधिकारी आनंद वैद्य, अनिल आचरेकर, प्रा. अनंत लोखंडे आदी उपस्थित होते. सामंत म्हणाले, ‘‘बाबा वर्दम थिएटर्स ही कुडाळ येथील हौशी कलाकारांची नाटयसंस्था (कै.) बाबा वर्दम, के. वामनराव पाटणकर, (कै.) शंकर वर्दम यांच्या प्रेरणेने व चंदू शिरसाट या प्रतिभावंत दिग्दर्शकांच्या मार्गदर्शनाखाली संस्थेच्या अध्यक्षा वर्षा वैद्य यांच्या नेतृत्वाखाली गेली ५२ वर्षे महाराष्ट्राच्या सांस्कृतिक क्षेत्रात अग्रस्थानी आहे. (कै.) चिं. त्र्यं. खानोलकर ऊर्फ आरती प्रभू यांच्या स्मृती चिरंतन राहाव्यात, यासाठी त्यांच्या नावाने कवी, कवयित्री आणि नाटककार यांना हा पुरस्कार दिला जातो. बाबा वर्दम थिएटर्स, कुडाळ आणि आरती प्रभू कला अकादमी, कुडाळ या संस्थांच्या संयुक्त विद्यमाने २०१३ पासून कविता आणि नाट्यक्षेत्रात उल्लेखनीय कामगिरी करणाऱ्या कवी किंवा नाटककारास हा पुरस्कार दरवर्षी दिला जातो. रोख ११००० रुपये, स्मृतिचिन्ह, मानपत्र व शाल, श्रीफळ असे या पुरस्काराचे स्वरूप आहे.’’ यावर्षीचा पुरस्कार पुणे येथील ज्येष्ठ नाटककार चं. प्र. देशपांडे यांना देण्यात येणार आहे. थिएटर्सचे संस्थापक चंदू शिरसाट, आरती प्रभू कला अकादमीचे अध्यक्ष अविनाश ऊर्फ भाई तळेकर, बाबा वर्दम थिएटर्सच्या अध्यक्षा वर्षा वैद्य यांच्या अध्यक्षतेखाली हा कार्यक्रम होईल. कार्यवाह केदार सामंत, आनंद वैद्य यांनी उपस्थित राहण्याचे आवाहन केले आहे.