बंद पथदीपांमुळे चालकांची गैरसोय

बंद पथदीपांमुळे
चालकांची गैरसोय
नांदगाव ः मुंबई-गोवा राष्ट्रीय महामार्गाच्या खारेपाटण ते कलमठ टप्प्यातील बसस्थानकांवरील पथदिवे व उड्डाण पुलावरील काही पथदिवे बंद आहेत. परिणामी वाहनचालक व पादचाऱ्यांना नाहक त्रास सहन करावा लागत आहे. याकडे लोकप्रतिनिधी व महामार्ग प्राधिकरण विभागाने लक्ष देण्याची गरज आहे. महामार्ग चौपदरीकरणानंतर या महामार्गाची देखभाल दुरुस्तीची जबाबदारी ठेकेदार कंपनीकडे आहे; मात्र ठेकेदार कंपनी बंद पथदीपांकडे दुर्लक्ष करत आहे. जिल्ह्यात सध्या गावोगावी हरिनाम सप्ताह, वार्षिक जत्रोत्सव, आंगणेवाडी यात्रा आदी उत्सव सुरू आहेत. कुणकेश्वर जत्रा अवघ्या काही दिवसांवर येऊन ठेपली आहे. यामुळे महामार्गावर मुंबईकर चाकरमानी व भाविकांच्या गाड्यांची वर्दळ वाढली आहे. उन्हाळा सुरू झाल्याने पर्यटकही येण्यास सुरुवात झाली आहेत. खारेपाटण ते कलमठ टप्प्यातील बंद पथदीप सुरू करावेत, अशी मागणी वाहनचालक, प्रवासी व पादचाऱ्यांमधून होत आहे.
................
वेंगुर्लेत पथनाट्यातून
मतदानाबाबत जागृती
वेंगुर्ले ः मतदान हा लोकशाहीचा आधारस्तंभ आहे. मतदान करणे हा नागरिकांचा मूलभूत अधिकार आणि जबाबदारी आहे. त्यांच्या हक्कांचे संरक्षण आणि समाजाच्या सर्वांगीण कल्याणासाठी योगदान देण्यासाठी एक शक्तिशाली साधन प्रदान करते. या नागरी कर्तव्याची प्रभावी अंमलबजावणी होण्यासाठी वेंगुर्ले नगरपरिषद व कला, वाणिज्य व विज्ञान महाविद्यालय, ओरोसच्या संयुक्त विद्यमाने वेंगुर्ले शहरात मार्केट परिसर व दाभोली नाका येथे मतदान जनजागृती पथनाट्य सादर करण्यात आले. महाविद्यालयाचे मुख्याध्यापक, शिक्षक, विद्यार्थी व नगरपरिषदेच्या प्रशासकीय अधिकारी संगीता कुबल, इतर अधिकारी व कर्मचारी उपस्थित होते. पथनाट्याद्वारे नवीन मतदार नोंदणी प्रक्रिया, नागरिक मतदान हक्क, मतदान केल्याने समाजातील सकारात्मक बदल आणि परिवर्तन, मतदानाची गरज तसेच मशिन व याविषयी लोकांमध्ये जनजागृती करण्यात आली.