नवोदयमधील विषबाधा झालेल्या वीसपैकी १७ मुलांना डिस्चार्ज

नवोदयमधील विषबाधा झालेल्या
वीसपैकी १७ मुलांना डिस्चार्ज

तिघांवर उपचार, चौकशीसाठी उपायुक्त सांगेलीत

सकाळ वृत्तसेवा
सावंतवाडी, ता. १० ः सांगेली जवाहर नवोदय विद्यालयात शिकत असलेल्या विद्यार्थ्यांना अन्नातून विषबाधा झाल्यानंतर त्यांच्या प्रकृतीत बरीच सुधारणा झाली आहे. येथील उपजिल्हा रुग्णालयात उपचार घेणाऱ्या वीस पैकी सतरा मुलांना आज उपचारानंतर घरी सोडण्यात आले. केवळ तीन मुलांवर आता रुग्णालयात उपचार सुरु असून त्यांची प्रकृती स्थिर असल्याची माहिती सांगेली प्राथमिक आरोग्य केंद्राच्या वैद्यकीय अधिकारी डॉ. प्रिंशा महिजन यांनी दिली.
दरम्यान, आज सांगेली नवोदय विद्यालयात केंद्रीय नवोदय विद्यालय समितीच्या पुणे विभागीय कार्यालयातील उपायुक्त माधुरी उदयशंकर चौकशीसाठी दाखल झाल्या आहेत. सलग तीन दिवस या संपूर्ण घटनेची चौकशी करुन झाल्यानंतर ते आपला अहवाल आयुक्तांना सादर करणार आहेत. आज दिवसभरात विद्यालयातील उर्वरीत मुलांना साधारण लक्षणे आढळून आली. त्यांच्यावर तातडीने आरोग्य केंद्रातील डॉक्टर व टीम पाठवून प्रतिबंधात्मक उपचार करण्यात आले. उपायुक्त उदयशंकर या घटनेची चौकशीसाठी आज विद्यालयात दाखल झाल्या असून त्यांनी विद्यालयातील प्राचार्य, संपूर्ण स्टाफ, कर्मचारी, मेस कर्मचारी, मेस ठेकेदार यांची बैठक घेतली. दिवसभर या प्रकरणाची चौकशी सुरु होती. यामध्ये जेवणासाठी वापरण्यात आलेले बटाटे खराब झाले होते, असा निष्कर्ष पुढे आला आहे. तरीही पुढील दोन दिवस ही चौकशी सुरु राहणार असून याचा संपूर्ण अहवाल पुणे विभागिय आयुक्त यांना सादर केला जाणार आहे.