जानवलीत १८ला भजनाचा सामना

जानवलीत १८ला
भजनाचा सामना
कणकवली ः जानवली वाकडवाडी येथे १८ मे रोजी डबलबारी भजनाचा सामना आयोजित करण्यात आला आहे. सत्यनारायण महापूजेच्या निमित्ताने चंद्रशेखर उर्फ गोट्या राणे यांच्या निवासस्थानी हा भजनाचा सामना होणार आहे. भरणी (कुडाळ) येथील बुवा योगेश पांचाळ आणि नागवे (कणखवली) येथील बुवा अमेय आर्डेकर यांच्यात हा सामना रात्री ९ वाजता होणार आहे. भाविकांनी उपस्थित राहण्याचे आवाहन राणे कुटुंबीयांनी केले आहे.
-----------
कनेडी बाजारात
वाहतुक कोंडी
कनेडी ः येथील बाजारपेठेत सकाळच्या सत्रात वाहतुकीची कोंडी होत आहे. मुंबई येथून मोठ्या प्रमाणात चाकरमानी आपली वाहने घेऊन आले आहेत. त्यामुळे बाजारपेठेत वाहतूक कोंडी होत आहे. काही रिक्षा चालक बेशिस्तपणे रिक्षा जागोजागी उभ्या करत आहेत. या रस्त्यावर जेव्हा एसटी बसगाड्या उभ्या केल्या जातात तेव्हा दोन वाहनांना मार्ग काढता येत नाही. त्यामुळे कनेडी बाजारात वाहतूक कोंडी होत आहे. यासाठी वाहतूक पोलिस नेमावा, अशी मागणी होत आहे.
------------
भिरवंडे परिसरात
पावसाची हजेरी
कनेडी ः सह्याद्री पट्ट्यात सोमवारी वादळी पावसाने हजेरी लावली. भिरवंडे, हरकुळ खुर्द परिसरात तुरळक पाऊस झाला. पावसामुळे हवेतील तापमानात घट झाल्याने उखाड्याने हैरान झालेल्या नागरिकांना दिलासा मिळाला आहे. गेले काही दिवस उन्हाचा पारा तापला आहे. मात्र, आता मॉन्सूनपुर्व पावसाची चाहुल लागल्याने शेतकरी सुखावला आहे. अचनक आलेल्या पावसामुळे गावातील धार्मिक कार्यक्रमांवर परिणाम होत आहेत.