चिपळूण- महाविकास आघाडीला विधानसभेतही आघाडी मिळेल

89048

महाविकास आघाडीला विधानसभेतही यश
रमेश कदम ; स्वार्थासाठी गेलेल्यांचा विचार करायचा नाही
चिपळूण, ता. ९ : चिपळूण विधानसभा मतदार संघातील मतदार शरद पवार यांच्यामागे उभे आहेत. ते विधानसभा निवडणुकीची वाट बघत आहेत. विधानसभा निवडणुकीत शरद पवार यांच्या राष्ट्रवादीला पर्यायाने महाविकास आघाडीला अभूतपूर्व यश मिळेल, असा विश्वास माजी आमदार रमेश कदम यांनी व्यक्त केला.
शरद पवार गटाच्या राष्ट्रवादी काँग्रेस पक्षाची बैठक चिपळुणात झाली. या वेळी लोकसभा निवडणुकीत पक्षाला मिळालेल्या यशाबद्दल पक्षाचे राष्ट्रीय अध्यक्ष शरदचंद्र पवार, महाराष्ट्राचे प्रदेशाध्यक्ष जयंतराव पाटील यांच्यासह शिवसेना पक्षप्रमुख उद्धव ठाकरे आणि काँग्रेसचे नेते राहुल गांधी तसेच लोकसभा निवडणुकीत विजयी झालेल्या महाविकास आघाडीच्या उमेदवारांच्या अभिनंदनाचा ठराव या बैठकीत मांडण्यात आला. या ठरावाला सर्व पदाधिकाऱ्यांनी सर्वानुमते मंजुरी दिली.
बैठकीला मार्गदर्शन करताना रमेश कदम म्हणाले, चिपळूणची जनता शरद पवार यांच्यामागे उभी आहे. ज्याप्रमाणे लोकसभा निवडणुकीत मतदारांनी महाविकास आघाडीच्या उमेदवाराला चिपळूणमधून मताधिक्य दिले त्याचप्रमाणे विधानसभा निवडणुकीतही महाविकास आघाडीच्या उमेदवाराला मतदार प्राधान्य देतील. स्वार्थासाठी शरद पवार यांना सोडून कोण कुठे गेला, याचा विचार करायचा नाही. आपण प्रामाणिकपणे शरद पवार यांच्याबरोबर राहून महाविकास आघाडीचा उमेदवार जिंकून आणण्यासाठी प्रयत्न करूया. महाविकास आघाडीचे जिल्ह्यातील नेते, पदाधिकारी व कार्यकर्ते पूर्ण ताकदीने काम करून विधानसभेत यश संपादन करतील. पक्षाचे प्रदेश उपाध्यक्ष कुमार शेट्ये, राष्ट्रवादीचे जिल्हाध्यक्ष सुरेशशेठ बने, राष्ट्रवादीचे नेते प्रशांत यादव, जिल्हा उपाध्यक्ष मिलिंद कीर, विधानसभा क्षेत्राध्यक्ष दत्ताराम लिंगायत, महिला जिल्हाध्यक्ष दीपिका कोतवडेकर उपस्थित होते.