मुंबई-गोवा वाहतूक पूर्वपदावर

मुंबई-गोवा वाहतूक पूर्वपदावर
खेड, ता. १० : मुंबई-गोवा महामार्गावर महाड-नडगाव (रायगड) गावाजवळ मुसळधार पावसामुळे दरड कोसळून वाहतूक ठप्प होती. प्रशासनाच्या अथक प्रयत्नाने दरड बाजूला हटवल्यानंतर मार्ग वाहतुकीसाठी पूर्ववत झाला आहे. त्यामुळे वाहनचालकांनी सुटकेचा नि:श्वास टाकला आहे. पावसामुळे नडगावनजीक अचानक दरड कोसळली होती. सुदैवाने दरडीमुळे कोणत्याही स्वरूपाची हानी झाली नसली तरी डोंगरातून आलेल्या दगडांमुळे महामार्ग काही काळ बंद ठेवावा लागला. रुंदीकरणाचे काम करत असताना मुसळधार पावसामुळे कोणत्याही स्वरूपाचा अपघात होणार नाही, याची खबरदारी महामार्ग खात्याने न घेतल्यामुळेच कोसळलेल्या दरडीमुळे वाहनचालकांची कोंडी झाली आहे. रायगड जिल्ह्यातील माणगावनजीकही डोंगर फोडून रुंदीकरण करण्यात आले आहे. तेथे दरडी कोसळण्याचा धोका कायमच आहे.