बिबट्याने केली हॉटेलमध्ये शिरून कुत्र्याची शिकार

बिबट्याने केली कुत्र्याची शिकार

साखरप्यातील हॉटेलमधील घटना सीसीटीव्हीत कैद

सकाळ वृत्तसेवा
साखरपा, ता. १० ः रत्नागिरी- कोल्हापूर महामार्गावर साखरपा येथे एका हॉटेलमध्ये बिबट्या शिरला आणि रिसेप्शन टेबलजवळ बसलेल्या कुत्र्याला उचलून निघून गेला. हा प्रकार मंगळवारी (ता. ८) मध्यरात्री घडला. ही घटना सीसीटीव्हीमध्ये कॅमेऱ्यात कैद झाल्यामुळे लक्षात आली. कुत्र्याच्या आवाजामुळे हॉटेलमध्ये झोपलेला कर्मचारी जागा झाला; मात्र तोपर्यंत बिबट्या कुत्र्याला घेऊन निघून गेला होता.
साखरपा परिसरात काही दिवसांपूर्वी बिबट्याच्या हल्ल्यात दोनजण जखमी झाल्याचे प्रकार घडले होते; मात्र हल्ला करणारा बिबट्या मृतावस्थेत आढळला. त्यानंतर या परिसरातील ग्रामस्थांनी निःश्वास सोडला होता. त्यानंतर मंगळवारी दुसरा बिबट्या आढळल्यामुळे स्थानिकांमध्ये भीतीचे वातावरण आहे. महामार्गावरील एका हॉटेलमध्ये बिबट्या शिरला आणि रिसेप्शन टेबलच्या बाजूला झोपलेल्या कुत्र्याला पकडून निघून गेला. सुदैवाने, रिसेप्शनच्या टेबलवर कोणीही बसलेले नव्हते. त्यामुळे अनर्थ टळला. ही घटना सीसीटीव्हीमध्ये कैद झाल्यामुळे उघड झाली. या परिसरात नवा बिबट्या दिसल्यामुळे नेमके किती बिबटे या भागात आहेत, असा प्रश्न उपस्थित केला जात आहे.