-क्राईम

गोवा बनावटीची
बारा लाखांची दारु जप्त

लांजा ः लांजा पोलिसांनी देवधे येथील हॅप्पी धाबासमोर विनापरवाना गोवा बनावटीची दारू वाहतूक करणाऱ्‍या खालापूर (जि. रायगड) येथील एकावर गुन्हा दाखल केला आहे. पोलिसांनी १२ लाख ७ हजार ४०० रुपयांचा मुद्देमाल जप्त केला आहे. संदेश विलास मांडे (वय ३४, रा. तळेगाव, ता. खालापूर) असे संशयिताचे नाव आहे. ही घटना सोमवारी (ता. २१) सायंकाळी सहाच्या सुमारास निदर्शनास आली. मांडे हा मोटारीतून विनापरवाना गोवा मद्याची वाहतूक करत असल्याचे पोलिसांच्या निदर्शनास आले. पोलिसांनी तो जप्त करून त्याच्यावर गुन्हा दाखल केला आहे.
-------
गोठ्यावर वीज पडून
तीन जनावरे दगावली
साडवली ः संगमेश्वर तालुक्यातील वाशीतर्फे-देवरूख येथील शेतकऱ्याच्या गोठ्यावर वीज पडून गोठ्यातील दोन बैल व एक दुभती गाय मृत झाली. तसेच तीन जनावरे जखमी झाली. ही घटना सोमवारी (ता. २१) रात्री नऊच्या सुमारास घडली. यामध्ये शेतकरी दत्ताराम पेंढारी यांचे एक लाख ६० हजारांचे नुकसान झाले आहे. या बाबत माहिती मिळताच पशुवैद्यकीय अधिकारी यांनी घटनास्थळी धाव घेतली. जखमी गुरांवर उपचार करणे व मृत्यू पडलेल्या गुरांचे विच्छेदन करण्याची प्रक्रिया सुरू करण्यात आली. स्थानिक ग्रामस्थांच्या सहकार्याने आपत्तीमधील जखमी जनावरांना सुखरूप बाहेर काढून मदतकार्य करण्यात आले. घटनेचा पंचनामा तलाठी द्वारकेश तायडे, ग्रामसेवक समीक्षा मोहिते, सरपंच सुनील सावंत, ग्रामपंचायत सदस्या अनुष्का सावंत यांनी केला. यावेळी ग्रामस्थ उपस्थित होते. या पंचनाम्यात पेंढारी यांचे अंदाजे एक लाख ६० हजार रुपयांचे नुकसान झाले आहे. जखमी जनावरांवर तातडीने उपचार सुरू करण्यात आले असून, जखमी तीन गायी सुखरूप आहेत.
---
पावसमधील जुगारावर छापा

पावस. ः पावस बसस्थानक येथील एका दुकान गाळ्याच्या पाठीमागे विनापरवाना जुगारावर पोलिसांनी कारवाई. संशयिताविरुद्ध पूर्णगड सागरी सुरक्षा पोलिस ठाण्यात गुन्हा दाखल करण्यात आला आहे. सचिन पांडुरंग बंडबे (रा. कोळंबे गोरीवलेवाडी, रत्नागिरी) असे संशयिताचे नाव आहे. ही घटना सोमवारी (ता. २१) सायंकाळी पावणेसातच्या सुमारास निदर्शनास आली. सचिन बंडबे यांच्याकडे मटका जुगाराचे साहित्यासह १ हजार १४० रुपयांचा मुद्देमाल सापडला. या प्रकरणी प्रशांत पाटील यांनी पूर्णगड पोलिस ठाण्यात तक्रार दिली. पोलिसांनी संशयिताविरुद्ध गुन्हा दाखल केला आहे.
----------