कणकवली : सिगारेट जप्त

विनापरवाना सहा लाखाच्या
सिगरेट फोंडाघाट येथे जप्त
कणकवली, ता. ३१ : कोल्हापूरहून गोव्याला जाणाऱ्या खासगी आराम बस मधून सहा लाख रुपये किमतीच्या विनापरवाना सिगरेट जप्त करण्यात आल्या. फोंडाघाट तपासणी नाक्‍यावरील स्थिर सर्वेक्षण पथकाकडून पहाटे चारच्या सुमारास ही कारवाई करण्यात आली. याबाबत सायंकाळी उशिरापर्यंत पोलीसात गुन्हा नोंद करण्याची प्रक्रिया सुरू होती.
कोल्‍हापूर ते गोवा जाणारी आराम बस तपासणीसाठी पहाटे चारच्या सुमारास फोंडाघाट तपासणी नाक्‍यावर थांबविण्यात आली होती. यात एका प्रवाशाच्या बॅगमध्ये ब्रॅण्डेड कंपनीच्या ६ लाख रूपये किंमतीच्या सिगरेट असल्याचे आढळून आले. तंबाखूजन्य पदार्थ वाहतूक करताना त्याला परवान्याची गरज असते. मात्र कोल्हापूर ते गोवा या आराम बस चालकाकडे तसेच बॅग घेऊन जाणाऱ्या प्रवाशाकडे त्‍याबाबतचा कोणताही परवाना नसल्‍याची बाब तपासणीमध्ये निष्पन्न झाली. फोंडाघाट तपासणी नाक्‍यावर कार्यरत असणारे उद्देश कदम, प्रशांत पाटील, नितीन बनसोडे आदींच्या पथकाने ही कारवाई केली. सायंकाळी उशिरापर्यंत याबाबत गुन्हा नोंद करण्याची प्रक्रिया पोलीसात सुरू होती.