राजापुरातील दोन मतदान केंद्रावरील मशिनबाबत तक्रार

राजापुरातील ‘त्या’ मशिनची पडताळणी करा

आमदार साळवी ः निवडणूक निर्णय अधिकाऱ्यांना पत्र
सकाळ वृत्तसेवा
राजापूर, ता. २९ : विधानसभा निवडणुकीचा निकाल जाहीर झाल्यानंतर विरोधी पक्षांकडून या निवडणुकीमध्ये वापरण्यात आलेल्या ईव्हीएम आणि व्हीव्हीपॅट मशिनबाबत संशय व्यक्त केला जात आहे. राजापूर मतदार संघातील दोन मतदान केंद्रातील ईव्हीएम व व्हीव्हीपॅट मशिनची पडताळणी करण्याची मागणी माजी आमदार राजन साळवी यांनी निवडणूक निर्णय अधिकाऱ्‍यांकडे केल्याची माहिती आमदार साळवी यांनी एका पत्रकाद्वारे दिली आहे.
राजापूर विधानसभा मतदार संघाच्या निवडणुकीचा निकाल २३ नोव्हेंबरला जाहीर करण्यात आला. या निकालावर संशय निर्माण झाल्यामुळे निवडणूक निर्णय अधिकाऱ्‍यांना निवेदन देऊन आक्षेप नोंदवला असल्याचे साळवी यांनी म्हटले आहे. निवडणूक प्रक्रिया व मतमोजणी प्रक्रिया संशयास्पद वाटत असल्याने मतदान केंद्र क्रमांक २ चाफवली व मतदान केंद्र २०० तुळसवडेचे ईव्हीएम मायक्रो कंट्रोलर व व्हीव्हीपॅटची पडताळणी करून निर्माण झालेला संशय दूर करावा, असे निवेदन दिल्याची माहिती माजी आमदार साळवी यांनी दिली आहे.