देवगडात १० मे रोजी राष्ट्रीय लोक अदालत

देवगडात १० मे रोजी
राष्ट्रीय लोक अदालत
देवगडः मुंबई उच्च न्यायालय, राज्य विधी सेवा प्राधिकरण मुंबई व जिल्हा विधी सेवा प्राधिकरण सिंधुदुर्ग यांच्या निर्देशास अनुसरून येथील दिवाणी न्यायालयात येत्या १० मे रोजी सकाळी १० वाजता राष्ट्रीय लोकअदालत आयोजित केली आहे. येथील तालुका विधी सेवा समिती व तालुका बार असोसिएशन यांच्यावतीने ही राष्ट्रीय लोकअदालत होणार आहे. ज्या पक्षकारांचे दिवाणी न्यायालयात प्रलंबित असलेले दिवाणी व फौजदारीकडील खटले किंवा सर्व राष्ट्रीयकृत बँका, सहकारी बँका, स्वायत्त संस्था, ग्रामपंचायत, नगरपंचायतीकडील वादपूर्व प्रकरणे तडजोडीने मिटवायची आहेत, त्यांनी आपली प्रकरणे तालुका विधी सेवा समिती कार्यालयाकडे लवकरात लवकर दाखल करावीत. ज्या पक्षकारांना आपले प्रकरण चर्चेद्वारे मिटवायचे असेल, अशा पक्षकारांनी वादपूर्व चर्चेसाठी या न्यायालयात हजर राहावे किंवा तसे जमत नसल्यास फोनद्वारे संपर्क साधावा. त्यानुसार संबंधित पक्षकारांना चर्चेची तारीख व माध्यम ठरविण्यात येईल. लोकन्यायालय यशस्वीतेसाठी सहकार्य करावे, असे आवाहन दिवाणी न्यायाधीश (‘क’ स्तर) तथा तालुका विधी सेवा समिती अध्यक्ष यांनी केले आहे.
....................
सावंतवाडी येथे शनिवारी
‘कथक संध्या’ कार्यक्रम
सावंतवाडीः नृत्यांगण कथ्थक क्लासेस सिंधुदुर्गच्या वतीने शनिवारी (ता. २६) सायंकाळी ६ वाजता येथील पालिकेच्या जनरल जगन्नाथराव भोसले उद्यान येथे ‘कथक संध्या’ या कार्यक्रमाचे आयोजन केले आहे. सिंधुदुर्गातील शंभरहून अधिक कथक कलाकारांनी नटलेला गायन, वादन व कथक नृत्यांचा त्रिवेणी संगम या कार्यक्रमामध्ये पाहायला मिळणार आहे. जास्तीत जास्त श्रोत्यांनी या कार्यक्रमाला उपस्थित राहावे, असे आवाहन नृत्यांगण कथ्थक क्लासेस सिंधुदुर्ग यांनी केले आहे.
...................