शिरगावमध्ये अत्याधुनिक रुग्णालयाचा प्रस्ताव

शिरगावमध्ये अत्याधुनिक रुग्णालयाचा प्रस्ताव
३० खाटांचे रुग्णालय ; २२ कोटी ३२ लाखाची गरज
सकाळ वृत्तसेवा
चिपळूण, ता. ५ः तालुक्यातील शिरगांव प्राथमिक आरोग्यकेंद्राचे ३० खाटांचे अत्याधुनिक ग्रामीण रुग्णालय व्हावे, या मागणीचा सामाजिक कार्यकर्ते सूरज शिंदे यांच्याकडून सातत्याने पाठपुरावा सुरू आहे. याचा अंतिम प्रस्ताव मंजुरीसाठी मंत्रालयाकडे सादर केला आहे. या श्रेणीवर्धन ग्रामीण रुग्णालयाच्या उभारणीसाठी २२ कोटी ३२ लाख रुपयांच्या निधीची आवश्यकता असल्याचे शिंदे यांनी सांगितले.
शिंदे यांनी राज्याचे सार्वजनिक आरोग्य व कुटुंबकल्याण मंत्री प्रकाश आबिटकर यांची कोल्हापूर येथे भेट घेतली. या रुग्णालयासाठी २२ कोटी ३२ लाखांच्या निधीची गरज आहे. शिरगाव प्राथमिक आरोग्यकेंद्राचे अत्याधुनिक ग्रामीण रुग्णालय व्हावे, अशी मागणी शिंदे यांनी २९ जुलै २०२४ मध्ये खासदार नारायण राणे यांच्याकडे केली होती. त्यानंतर जिल्हा आरोग्य अधिकारी अनिरुद्ध आठल्ये यांनी २१ ऑगस्ट २०२४ ला त्याचा प्रस्ताव जिल्हा शल्यचिकित्सक यांच्याकडे पुढील कार्यवाहीसाठी पाठवला होता. त्यावर विचार करून जिल्हा शल्यचिकित्सकांनी ग्रामीण रुग्णालय श्रेणीवाढीसाठी लागणारी सर्व कागदपत्रे शिरगाव प्राथमिक आरोग्यकेंद्राकडून मागवली. त्यानंतर जिल्हा शल्यचिकित्सकांनी १७ फेब्रुवारी २०२५ ला श्रेणीवाढ प्रस्ताव उपसंचालकांना (कोल्हापूर) सादर केला. ही श्रेणीवाढ प्रक्रिया अंतिम टप्प्यात असून, मंत्रालयाकडे अंतिम टप्प्यात मंजुरीसाठी सादर केला आहे.