उपबाजार

जनावरांचा चिखलीत उपबाजार
डॉ. शिंदे ः रत्नागिरी बाजार समितीला अनुमती
सकाळ वृत्तसेवा
रत्नागिरी, ता. १४ ः जिल्हा कृषी उत्पन्न बाजार समितीच्या कार्यक्षेत्रात नियमन करण्यात आलेल्या गुरांच्या खरेदी-विक्रीसाठी चिखली (ता. गुहागर, जि. रत्नागिरी) उपबाजार म्हणून स्थापन केल्याचे जिल्हा उपनिबंधक डॉ. सोपान शिंदे यांनी सांगितले. ही अधिसूचना महाराष्ट्र शासन राजपत्रात प्रसिद्ध झाल्याच्या तारखेपासून अंमलात येईल.
रत्नागिरी जिल्हा कृषी उत्पन्न बाजार समिती ही महाराष्ट्र कृषी उत्पन्न खरेदी-विक्री अधिनियम १९६३ व त्याखालील नियमांतर्गत तरतुदीनुसार सहकार, पणन व वस्त्रोद्योग विभागाकडील अधिसूचनेनुसार संपूर्ण रत्नागिरी जिल्हा महसूल क्षेत्रापुरती स्थापन करण्यात आली आहे. त्यामुळे पशूपासून मिळणारे उत्पन्न म्हणजेच कोंबड्या, गुरेढोरे, मेंढ्या व बकरी यांच्या खरेदी-विक्रीतून मिळणारे यांचे नियमन करण्यात आलेले आहे.
बाजार समितीकडील पत्रानुसार, चिखली येथे गुरांचा उपबाजार सुरू करण्याविषयी उक्त बाजार समितीच्या संचालक मंडळाची मासिक सभेत सर्वानुमते निर्णय करण्यात आला आहे. हा बाजार सुरू करण्याबाबत हरकतीही मागवण्यात आल्या होत्या; मात्र दिलेल्या मुदतीत कोणतीही सूचना व हरकत कार्यालयाकडे दिलेली नाही, हे लक्षात घेऊन रत्नागिरी जिल्हा कृषी उत्पन्न बाजार समितीच्या कार्यक्षेत्रातील चिखली येथील उपबाजारास नियमन करण्यात आलेल्या गुरांची खरेदी-विक्री करण्यास अनुमती दिली गेली आहे. या ठिकाणी कोंबड्या, गुरेढोरे, मेंढ्या व बकरी यांची खरेदी –विक्री करता येईल, असे अधिसूचनेत नमूद केले आहे.