‘शासकीय कार्यालयांतील वातानुकुलित यंत्रे हटवा’

‘शासकीय कार्यालयांतील
वातानुकुलित यंत्रे हटवा’
सावंतवाडी : शासकीय कार्यालयात विनापरवानगी वातानुकुलित यंत्रणा बसविली आहे. त्याबाबत सामाजिक कार्यकर्ते बाळू निचम यांनी जिल्हाधिकाऱ्यांना निवेदन दिले आहे. निवेदनात म्हटले आहे की, शासकीय दालन व कार्यालयात बसविलेली वातानुकुलित यंत्रे तत्काळ काढून खरेदीचा खर्च वसुल करावा व शासन दप्तरी भरावा. जिल्हाधिकारी व त्या समदर्जाचे अधिकारी यांना त्यांच्या दालनात वातानुकुलित यंत्र बसविण्यास शासनाची कोणतीही परवानगी नाही. अन्य जिल्ह्यातील खातेप्रमुखांनाही परवानगी नाही. त्यामुळे जिल्ह्यात शासकीय अधिकाऱ्यांच्या दालनात असणारी वातानुकुलित यंत्रे तत्काळ काढावीत. त्या यंत्राची रक्कम वेतनातून वसूल करून शासन सदरी भरणा करावी. वातानुकुलित यंत्र लावण्याबाबत शासन निर्देश अगर त्याबाबत कार्यवाही वा अन्य तरतुदी उपलब्ध असल्यास तसे अवगत करावे, अशीही मागणी करण्यात आली आहे.
---------
मालवणात १६ पासून
पावसाळी क्रिकेट स्पर्धा
मालवण : रेवतळे मित्रमंडळ आयोजित भव्य पावसाळी रबर बॉल लीग क्रिकेट स्पर्धा मालवण प्रीमियर लीग २०२५ - युवा चषक १६ ते २० जून या कालावधीमध्ये महापुरुष रेवतळे मैदान येथे होणार आहे.