एलएलबी परीक्षेमध्ये सहिष्णू पंडित प्रथम

70618

एलएलबी परीक्षेमध्ये
सहिष्णू पंडित प्रथम
मालवण : व्हिक्टर डांटस लॉ कॉलेज कुडाळचा विद्यार्थी व मालवण येथील सहिष्णू पंडित यांनी एलएलबी २०२४- २५ या शैक्षणिक वर्षात तथा पाच वर्षांच्या कायदे अभ्यासक्रमाच्या अंतिम वर्षात महाविद्यालयातून प्रथम क्रमांक प्राप्त केला. मुंबई विद्यापीठ अंतर्गत या कायदे अभ्यासक्रमासाठी महाविद्यालयातून प्रथम श्रेणी व प्रथम क्रमांक असे यश प्राप्त केल्याबद्दल सहिष्णू यांनी व्हिक्टर डांटस लॉ कॉलेजचे चेअरमन व्हिक्टर डांटस आणि प्राचार्या शिल्पा मर्गज तसेच महाविद्यालयीन प्राध्यापक वर्ग आणि कर्मचारी, महाविद्यालयीन वरिष्ठ व सह अध्यायी मंडळी यांच्याविषयी कृतज्ञता व्यक्त केली आहे. सहिष्णू हे मालवण टोपीवाला हायस्कूलचे माजी शिक्षक (कै.) श्रीनिवास पंडित व ज्येष्ठ साहित्यिक वैशाली पंडित यांचे नातू आणि रोझरी इंग्लिश स्कूल मालवणच्या ज्येष्ठ शिक्षिका फिलोमीना पंडित यांचे चिरंजीव होय. त्यांच्या यशाबद्दल जिल्हा तसेच मालवणात अभिनंदन होत आहे.
..................
70619

नीट परीक्षेमध्ये
यश कदमचे यश
मालवण : शहरातील मेढा येथील रहिवासी यश कदम यांनी नीट परीक्षेत १८२३ रँक मिळवित नेत्रदीपक यश प्राप्त केले. यश याने प्राथमिक व माध्यमिक शिक्षण टोपीवाला हायस्कूल येथे पूर्ण केले, तर उच्च माध्यमिक शिक्षण सांगली येथील क्लिअर कन्सेप्ट अकादमीमध्ये केले. बारावीमध्ये ८६ टक्के गुण त्याने मिळविले. आता नेट परीक्षेतही ५९४ गुण मिळवित यश प्राप्त केले. या परीक्षेसाठी देशभरातून लाखो विद्यार्थी प्रविष्ट झाले होते. त्यात त्याने १८२३ वी रँक प्राप्त केली आहे. यश हा सिद्धेश प्रिंटर्सचे मालक मिलिंद कदम व मानसी कदम यांचा मुलगा होय. त्याच्या या यशाबद्दल त्याचे सर्वत्र अभिनंदन होत आहे.