महामार्गावर आरवलीत गटाराला भगदाड

७०७५०

महामार्गावर आरवलीत
गटाराला पडले भगदाड
संगमेश्वर, ता. १५ : मुंबई-गोवा महामार्गाच्या कामाच्या गुणवत्तेबाबत पुन्हा एकदा गंभीर प्रश्नचिन्ह निर्माण झाले आहे. संगमेश्वर तालुक्यातील आरवली येथे महामार्गालगतच्या सर्व्हिस रोडवर बांधलेल्या गटाराला पहिल्याच पावसात मोठे भगदाड पडले आहे. यामुळे रस्त्याच्या कामाच्या दर्जाबाबत नागरिकांकडून तीव्र संशय व्यक्त होत आहे. विशेष म्हणजे, सेवा रस्त्याचे काम पावसाळ्यात हाती घेण्यात आल्याने आणि वाहतुकीची कोणतीही योग्य व्यवस्था न केल्यामुळे गरम पाण्याच्या कुंडाजवळ मोठ्या अपघाताची शक्यता निर्माण झाली आहे. महामार्गाला पडलेल्या जुन्या भेगा रुंदावत चालल्या आहेत.
एप्रिल महिन्यात आरवली येथील सेवा रस्त्याच्या गटारींचे काँक्रिटीकरण करण्यात आले होते. येथील सर्व्हिस रोडचे गटार ढासळण्यास सुरुवात झाली असून, त्याला मोठे भगदाड पडले आहे. यामुळे बाजारात ये-जा करणाऱ्या लोकांना जीव मुठीत धरून चालावे लागत आहे. तसेच मोठा धोका निर्माण झाला आहे. गरम पाण्याच्या कुंडाजवळच महामार्गावर गेल्यावर्षी भेगा पडल्या होत्या. या भेगा बुजवण्याऐवजी त्यावर तात्पुरती मलमपट्टी केली होती. आता या भेगा पुन्हा रुंदावत असल्याने महामार्गावरील वाहतूक बाधित होण्याची शक्यता निर्माण झाली आहे. येथील सर्व्हिस रोडच्या काँक्रिटीकरणाचे काम पाऊस सुरू झाल्यावर हाती घेण्यात आले आहे. पावसाळ्यापूर्वी हे काम पूर्ण करणे आवश्यक होते; मात्र आता पावसात हे काम सुरू केल्यामुळे या बाजूने वाहतूक बंद करून दुसऱ्या बाजूने धोकादायक पद्धतीने वळविण्यात आली आहे.