आषाढी वारीसाठी धावणार एसटीच्या ५० गाड्या

आषाढीसाठी एसटीच्या ५० गाड्या
रत्नागिरी आगाराकडून नियोजन ; भाविकांची सोय
सकाळ वृत्तसेवा
रत्नागिरी, ता. २४ : आषाढी वारीसाठी लाखो वारकरी, भाविक पंढरपूरला लाडक्या विठुरायाचे दर्शन घेण्यासाठी जातात. आषाढी वारी अवघ्या काहीच दिवसांवर येऊन ठेपली असून, वारकरी, भाविकांना पंढरपूरला जाण्याचा मार्ग अधिक सुखकर व्हावा, यासाठी एसटी महामंडळाच्या वतीने नियोजन केले आहे. राज्यातून तब्बल ५ हजार ३०० बसेस विविध मार्गावरून धावणार आहेत. रत्नागिरी आगारातून ५० एसटी बसेस उपलब्ध करून देण्यात येणार आहेत. रत्नागिरीकरांनी आषाढी वारीनिमित्त पंढरपूरला जाण्यासाठी जास्तीत जास्त बुकिंग करावे, असेही आवाहन एसटी विभागाच्यावतीने केले आहे.
महाराष्ट्र, कर्नाटक, आंध्र प्रदेशसह इतर राज्यांतील लाखो वारकरी, भाविक पंढरपूला जात असतात. आषाढीनिमित्त पंढरपूरला जाणाऱ्या भाविकांची गर्दी दरवर्षी वाढत चालली आहे. यंदाही भाविक विठ्ठलाच्या दर्शनासाठी निघाले आहेत. जिल्ह्यासह राज्यभरातून भाविक पंढरपूरला जात असल्यामुळे वारकरी, भाविकांचा प्रवास सुखकर व्हावा यासाठी एसटी महामंडळाच्यावतीने यंदाही ५ हजाराहून अधिक एसटी बसेसचे नियोजन केले आहे. रत्नागिरी आगारातूनही जादा बसेस सोडण्यासाठी नियोजन सुरू असून, अंदाजे ५० एसटी बस पंढरपूरला धावणार आहेत. अद्याप किती बसेस धावणार आहेत, याचा निर्णय झालेला नाही. मागील वर्षी ३० बसेस पंढरपूला धावल्या होत्या. यंदाही जास्तीत जास्त एसटी बसेस उपलब्ध करण्याचे नियोजन आगाराने केले आहे. वारकरी, भाविकांनी तिकीट बुकिंग करण्याचे आवाहन करण्यात आले आहे.

चौकट
महिला, ज्येष्ठ नागरिकांसाठी विशेष सवलत
आषाढी वारीनिमित्त एसटी महामंडळाच्यावतीने यंदाही ७५ वर्षांवरील ज्येष्ठ नागरिकांना मोफत, तर महिला, ६५ वर्षांवरील नागरिकांसाठी अर्धे तिकीट असणार आहे. याचाही लाभ वारकरी, भाविकांनी घ्यावा, असे आवाहनदेखील एसटी आगारामार्फत केले आहे.