रत्नागिरी -शाळकरी विद्यार्थ्यांवर हिंदी विषयाची सक्ती नसावी

प्राथमिक शाळेत हिंदी विषयाची सक्ती नसावी
कोमसाप; तिसऱ्या भाषेचा आग्रह करणे अन्यायकारक
रत्नागिरी, ता. २४ : राज्यात प्राथमिक शाळेतील विद्यार्थ्यांवर हिंदी विषयाची सक्ती नसावी, अशी भूमिका आहे. राजकारण्यांबरोबरच साहित्य क्षेत्रातील महत्त्वाचे योगदान असलेल्या कोकण मराठी साहित्य परिषदेनेही तिसऱ्या भाषेच्या सक्तीला विरोध दर्शवला आहे.
कोकण मराठी साहित्य परिषदेच्यादृष्टीने पहिली ते चौथीच्या विद्यार्थ्यांच्या मानसिक, शारीरिक आणि बौद्धिक क्षमतेचा विचार करता पहिलीपासून हिंदी या तिसऱ्या भाषेचा आग्रह करणे अन्यायकारक वाटते. बालवयातील मुलांची मानसिकता लक्षात घेता राज्यातील अनेक नामवंतांनी, शिक्षणतज्‍ज्ञांनी जाहीरपणे इतक्या लहान वयात तिसऱ्या भाषेचे अध्ययन हे वर्तमान पिढीला झेपणारे नाही, हे स्पष्टपणे सांगितले आहे. सरकारने घेतलेल्या भाषा सक्तीच्या या निर्णयाला एकांगी समजून कोकण मराठी साहित्य परिषदेने विरोध दर्शवला आहे. कोकण मराठी साहित्य परिषदेच्या केंद्रीय अध्यक्षा नमिता कीर व कार्याध्यक्ष डॉ. प्रदीप ढवळ यांनी स्पष्ट केले.