ख्रिस्ती बांधवांचा ‘सांजाव’ सिंधुदुर्ग जिल्ह्यात थाटात

73007
73026

जिल्ह्यात ख्रिस्ती बांधवांचा रंगला ‘सांजाव’

सकाळ वृत्तसेवा
सिंधुदुर्गनगरी, ता. २५ ः मॉन्सूनच्या सुरुवातीला ख्रिस्ती बांधवांच्या उत्साहाचा सण म्हणजे ‘सांजावं’. ओरोस ख्रिश्चनवाडी येथील संत फ्रान्सिस चर्चमध्ये सांजाव सण मंगळवारी (ता. २४) उत्साहात साजरा झाला.
सकाळपासून पावसाने जोर धरला होता. यामुळे ख्रिस्ती बांधव व युवक-युवती मोठ्या उत्साहाने सहभागी झाले. सांजाव सण विशेषतः कोकण व गोव्यात खूप महत्त्वाचा माणला जातो. हा सण संत जॉन बाप्तिस्ता यांचा जन्मदिवस म्हणून पारंपरिक पद्धतीने साजरा केला जातो. रंगीत फुलांचे मुकुट म्हणजेच कॉपेल, हातामध्ये माडाच्या फांद्या, कोकणी गीत आणि वाद्यांचा गजर करत हा सण साजरा होतो. ओरोस ख्रिश्चनवाडी येथे हिंदू बांधवदेखील यामध्ये सहभागी झाले. ख्रिस्ती बांधवांचा उत्साह उल्लेखनीय होता. याची सांगता करताना सर्वांना चांगले आरोग्य व सुखी जीवनासाठी प्रार्थना करण्यात आली.