पाणी

- rat२५p२८.jpg-
P२५N७३१२९
दापोली ः पाजपंढरी येथे समुद्राचे पाणी नागरी वस्तीत शिरल्याने नुकसान.

पाजपंढरीत किनारपट्टी वस्तीत शिरले पाणी
समुद्राच्या मोठ्या लाटा ; संरक्षक भिंत अत्यंत गरजेची
सकाळ वृत्तसेवा
गावतळे, ता. २६ ः दापोली तालुक्यातील मच्छीमार बांधवांचे गाव म्हणून प्रसिद्ध असलेले पाजपंढरी गावातील समुद्रालगतच्या घरांमध्ये बुधवारी अमावस्येच्या दिवशी समुद्राच्या उसळणाऱ्या महाकाय लाटांचे पाणी घुसल्याने वस्तीला मोठा धोका निर्माण झाला आहे. त्यामुळे येथील नागरी वस्तीची सुरक्षितता लक्षात घेऊन वस्तीच्या संरक्षणासाठी प्राधान्यक्रमाने समुद्रालगत संरक्षक भिंत बांधणे अत्यंत गरजेचे झाले आहे.
पाजपंढरी या गावाची वस्ती अगदी पूर्वापार समुद्राच्या काठावरच वसलेली आहे. समुद्रातील वातावरणाच्या बदलाने अथवा जेव्हा वादळसदृश परिस्थिती निर्माण होते तेव्हा समुद्राच्या पाण्याला येणाऱ्या उधाणाच्या भरतीच्या लाटांचे पाणी पाजपंढरी येथील नागरी वस्तीत शिरत असल्याने अगदी समुद्राच्या काठावरच वसलेल्या वस्तीतील रहिवाशांचे खूपच नुकसान होत असते. मासेमारी व्यवसाय करणारे दर्यावर्दी लोक असल्याने ते अगदी पूर्वापार समुद्राच्या काठावरच राहत आले आहेत. या ठिकाणी त्यांच्या सुरक्षिततेसाठी समुद्राच्या काठावर नागरी वस्तीला संरक्षण म्हणून संरक्षक भिंत उभारली तर समुद्रातील उधाणाच्या उसळणाऱ्या लाटांपासून त्यांचे संरक्षण होईल. हवामान विभागाने २४ जूनपासूनच पुढे २८ जूनपर्यंत सलग ५ दिवस समुद्राला मोठी भरती येणार असून, समुद्रात मोठ्या उंचीच्या लाटा उसळणार असल्याचा अंदाज वर्तवला होता. हर्णै पाजपंढरी येथील समुद्रात मोठ्या उंचीच्या लाटा उसळत असून, समुद्रात उसळणाऱ्या लाटांचे पाणी नागरी वस्तीत शिरत असल्याने या नागरी वस्तीला मोठा धोका निर्माण झाला आहे. २४ जूनपासून भरतीच्या पाण्याचे मोठे उधाण त्यात पावसाळी हंगाम यामुळे समुद्र खवळला असून, समुद्रात उंचच उंच लाटांचे तांडव सुरू आहे. या उसळणाऱ्या लाटा आणि घोंगावणारे वारे यामुळे अनेकांच्या मालमत्तांचे किरकोळ नुकसान झाले आहे.