जिल्ह्यात साथीच्या आजारांना सुरवात

जिल्ह्यात साथीच्या आजारांना सुरुवात
खासगी रुग्णालयात गर्दी ; थंडी तापाचे रुग्ण अधिक
सकाळ वृत्तसेवा
रत्नागिरी ता. २७ ः जिल्ह्यात पावसाने दमदार हजेरी लावली आहे. दुसरीकडे पावसाळ्यात साथीचे आजार पसरले आहेत. साथीच्या आजारामुळे जिल्हा शासकीय रुग्णालयात ओपीडी हाऊसफुल झाली असून, दररोज रुग्णांची गर्दी वाढू लागली आहे तसेच जिल्ह्यातील खासगी रुग्णालयातही रुग्णांच्या गर्दीत वाढ झाली आहे.
पावसाळा आला की, साथीचे आजार पसरण्याचा धोका दरवर्षी निर्माण होतो. यंदाच्या वर्षी पावसाने रत्नागिरी जिल्ह्याला झोडपून काढले आहे. या पावसासोबतच जिल्ह्यात साथीच्या आजारांनी आपले हातपाय पसरले आहे. त्यामुळे शासकीय रुग्णालयाबरोबरच खासगी दवाखान्यात रुग्णांची गर्दी वाढली आहे. लहान मुलांमध्ये थंडी, ताप, उलट्या, जुलाबाचे प्रमाण वाढले आहे. डेंगी, मलेरिया, चिकुनगुनिया यासारखे आजार वाढत आहेत.
आरोग्य विभागाने साथीच्या आजारावर मात करण्यासाठी पाणी उकळून गार केलेले पाणी प्यावे, फिल्टर केलेले पाणी प्या, सोबत पाण्याची बाटली ठेवा, बाहेरचे खाणे टाळावे, लहान मुलांची नखे काढा, बाहेरून आल्यावर हात स्वच्छ धुवा न वाळलेले कपडे वापरू नका, आपल्या अवतीभोवती कुंड्यात जुन्या वस्तूत, घरासमोर पाणी साचू देऊ नका, असे आवाहन केले आहे.