आरोंद्यात विद्यार्थी गुणगौरव सोहळा

73783
आरोंद्यात विद्यार्थी गुणगौरव सोहळा

भोगले प्रतिष्ठानचा उपक्रम; शिक्षक, कर्मचाऱ्यांचाही सत्कार

सकाळ वृत्तसेवा
सावंतवाडी, ता. २८ ः आरोंदा येथील मोहन भोगले प्रतिष्ठानतर्फे आयोजित गुणवंत विद्यार्थ्यांचा कौतुक सोहळा रविवारी (ता. २२) उत्साहात झाला. प्रतिष्ठानचे अध्यक्ष संदेश परब यांच्या अध्यक्षतेखाली हा कार्यक्रम पार पडला.
कार्यक्रमासाठी प्रमुख पाहुणे म्हणून सावंतवाडीचे प्रसिद्ध वकील अॅड. अभिजित पणदूरकर उपस्थित होते. व्यासपीठावर लायन्स क्लबचे अध्यक्ष अमय पै उपस्थित होते. प्रतिष्ठानतर्फे दहावी परीक्षेत यशस्वी झालेल्या विद्यार्थ्यांना सुकन्या पुरस्कार, श्यामसंदर कुबडे पुरस्कार, प्रेरणा पुरस्कार, प्रयास व यशवंत पुरस्कार असे पुरस्कार देऊन गौरविले. शिवाय आरोंदा गावचे उद्योजक व समाजसेवक प्रभाकर नाईक यांनी त्यांच्या स्वर्गीय पत्नी (कै.) पुष्पा नाईक यांच्या स्मृतिप्रीत्यर्थ गावातील विद्यार्थ्यांना २५ हजार, २० हजार व १५ हजार अशी पुरस्कृत केलेली बक्षिसे देऊन गौरविले.
याच कार्यक्रमात सावंतवाडी तालुक्यातून प्रथम आलेल्या रेश्मा संदेश पालव हिला (कै.) पुष्पा प्रभाकर नाईक स्मृती प्रीत्यर्थ ‘तेजस्विनी’ पुरस्कार (रोख १५ हजार) देऊन गौरविले. आरोंदा हायस्कूलमधील दहावी परीक्षेत १०० टक्के गुण मिळविलेल्या विद्यार्थ्यांसह हायस्कूल संस्थाचालक, शिक्षक व कर्मचाऱ्यांचाही सत्कार केला.
अॅड. पणदूरकर यांनी विद्यार्थ्यांना करिअरच्या विविध वाटा सांगितल्या. अध्यक्षीय भाषणात संदेश परब यांनी प्रतिष्ठानच्या भविष्यातील योजनांची माहिती दिली. मनोज आरोंदेकर, विद्याधर नाईक, सुधाकर नाईक, सुरेंद्र कामत, चेतन आरोसकर, ऑगस्तिन फर्नांडिस, आनंद नाईक, ग्रामपंचायत सदस्य गोविंद (आबा) केरकर, प्रशांत कोरगावकर, आरोंदा मंडळाचे स्थानिक अध्यक्ष सदानंद पिंगुळकर, संस्थाचालक रूपेश धर्णे, आरोंदा हायस्कूलचे मुख्याध्यापक सिद्धार्थ तांबे, आरोंदा हायस्कूलचे संस्थाचालक व समाजसेवक भाई देऊळकर आदी उपस्थित होते. प्रा. नीलम धुरी यांनी सूत्रसंचालन केले. प्रतिष्ठानचे सचिव रामदास पेडणेकर यांनी आभार मानले.