जिल्ह्यात आपत्कालीन मदत आता वेगवान

73774

जिल्ह्यात आपत्कालीन मदत आता वेगवान

दीपक केसरकर : ‘चांदा ते बांदा’मधून बचाव पथकास आधुनिक साहित्य

सकाळ वृत्तसेवा
सिंधुदुर्गनगरी, ता. २८ ः आपत्तीमुळे बाधित झालेल्या लोकांना मदत करणे, ज्यामध्ये तत्काळ प्रतिसादाला अत्यंत महत्त्व आहे. ‘चांदा ते बांदा’ योजनेअंतर्गत शोध व बचाव पथकांना अत्याधुनिक आपत्ती व्यवस्थापन साहित्य मिळाल्यामुळे ते अधिक प्रभावीपणे कार्य करू शकणार असल्याचे मत ‘सिंधुरत्न’ योजनेचे अध्यक्ष तथा आमदार दीपक केसरकर यांनी साहित्य वितरण कार्यक्रमात व्यक्त केले.
‘चांदा ते बांदा’ योजनेंतर्गत आंबोली व सांगेली येथील शोध व बचाव पथकासाठी साहित्य वितरण कार्यक्रम जिल्हाधिकारी कार्यालयात झाला. यावेळी माजी शिक्षणमंत्री, आमदार केसरकर बोलत होते. यावेळी जिल्हा बँकेचे अध्यक्ष मनीष दळवी, निवासी उपजिल्हाधिकारी मच्छिंद्र सुकटे, जिल्हा नियोजन समिती सदस्य सचिन वालावलकर, राष्ट्रीय आपत्ती निवारण पथकाचे प्रमुख आर. जे. यादव, आपत्ती व्यवस्थापन अधिकारी श्रीमती सामंत तसेच आंबोली व सांगेलीतील स्थानिक बचाव पथकातील सदस्य उपस्थित होते.
श्री. दळवी म्हणाले, ‘चांदा ते बांदा आणि ‘सिंधुरत्न’ योजनेमुळे जिल्ह्यातील शेतकरी, महिला आणि तरुणांना रोजगार उपलब्ध झाला आहे. या योजनेंतर्गत बचाव पथकांना अत्याधुनिक साहित्याचे वाटप झाल्याने अनेक जीव वाचणार आहेत.’ कार्यक्रमाच्या प्रास्ताविकात निवासी उपजिल्हाधिकारी मच्छिंद्र सुकटे यांनी या साहित्यामुळे बचाव पथकाला कशा प्रकारे मदत होणार आहे, हे सांगितले. आपल्या जिल्ह्यातील स्थानिक बचाव पथकाला आपत्ती निवारणाचे प्रशिक्षण दिले आहे. विशेष म्हणजे आंबोली व सांगेली येथील पथक या कार्यात निष्णांत आहे. या साहित्यामुळे आता ते अधिक प्रभावीपणे काम करू शकणार असल्याचेही ते म्हणाले.
-------
‘बचाव कार्याला मिळाले बळ’
आमदार केसरकर म्हणाले, ‘आंबोली परिसरातील नागरिक आपत्तीवेळी मदतीला धावतात. आपत्ती काळात प्राण वाचविण्याचे त्यांचे कार्य अनेक वर्षांपासून सुरू आहे. बचाव पथकाला अत्याधुनिक साहित्य मिळाल्यामुळे त्यांचे कार्य अधिक सुलभ होणार आहे. या साहित्यामध्ये एक चारचाकी वाहन, ड्रोन कॅमेरा, अंडरवॉटर कॅमेरा, वॉकी टॉकी या साहित्याचा समावेश आहे. या सहित्यामुळे बचाव कार्याला बळ मिळणार आहे.’