तरुणांनो, देशसेवेची नशा लावून घ्या

73950

तरुणांनो, देशसेवेची नशा लावून घ्या

अतुल जाधव ः विद्यामंदिर येथे नशामुक्त भारत अभियान

कणकवली,ता. २९ ः ‘‘दारू, गुटखा, सिगारेट, अमली पदार्थ यासारख्या सर्व नशेपासून स्वतःला दूर केले पाहिजे. नशेच्या आहारी जाऊन नकळतपणे गुन्हा घडतो. त्यामुळे पुढील आयुष्य बरबाद होते. त्यापेक्षा तरुणांनी देशसेवेची नशा स्वतःला लावून घ्या,’’ असे आवाहन कणकवली पोलिस निरीक्षक अतुल जाधव यांनी येथे केले.
येथील विद्यामंदिर माध्यमिक प्रशालेत नशामुक्त भारत अभियान राबविण्यात आले. यावेळी श्री. जाधव मार्गदर्शन करीत होते. ‘नशेमुळे होणारे दुष्परिणाम आणि उपाययोजना’ या विषयावर यावेळी मार्गर्शन केले.
गेली पंधरा वर्षे नशा मुक्तीसाठी संपूर्ण जिल्ह्यात शाळा, कॉलेज व गावागावांत नशाबंदी मंडल महाराष्ट्र राज्य सिंधुदुर्ग जिल्हा संघटक अर्पिता राजेंद्र मुंबरकर जनजागृती करीत आहेत. त्यांनी विद्यार्थ्यांना व्यसनाची सुरुवात कशी होते. त्यापासून दूर कसे राहायचे? याविषयी माहिती दिली. प्रशालेचे पर्यवेक्षक अच्युतराव वनवे म्हणाले की, ‘‘नशेच्या आहारी जाऊन सामान्य नागरिकच नाही तर मोठमोठे नेते, कलाकार, खेळाडूंचे जीवनही उद्ध्वस्थ झाले आहे. त्यामुळे रोज व्यायाम, पोषक आहार घेऊन निरोगी व आनंदी जीवन जगा.’’ कलाशिक्षक प्रसाद राणे यांनी या कार्यक्रमाचे नियोजन केले. विलास ठाकूर यांनी सूत्रसंचालन केले. पोलिस उपनिरीक्षक वृषाली बर्गे, पवन कांबळे, पोलिस नाईक विनया सावंत, देवेंद्र जाधव, हवालदार पाडुरंग पांढरे आदी होते.