स्केटिंग चॅम्पियनशिप स्पर्धेत ओवी शेटेची दमदार कामगिरी

73992

स्केटिंग चॅम्पियनशिप स्पर्धेत
ओवी शेटेची दमदार कामगिरी

दोन सुवर्णांसह चार पदकांना गवसणी

सकाळ वृत्तसेवा
मसुरे, ता. २९ ः मूळ गुहागर येथील मुंबई-ठाणे येथे वास्तव्यास असलेली आणि मसुरे चांदेरवाडी येथे आजोळ असलेली ओवी शेटे हिने डेहराडून (उत्तराखंड) हिमाद्री आईस रिंक येथे १६ ते २३ दरम्यान आयोजित महाराष्ट्र राज्य अजिंक्यपद आईस लाँग ट्रॅक्स स्पीड स्केटिंग चॅम्पियनशिप स्पर्धेत दोन सुवर्णपदके आणि आईस शॉर्ट ट्रॅक स्पीड स्केटिंग चॅम्पियनशिपमध्ये दोन रौप्यपदके मिळविली. या देदीप्यमान कामगिरीमुळे गुहागर, मुंबई-ठाणे आणि मसुरे गावच्या शिरपेचात मानाचा तुरा रोवला आहे.
ओवी ही मुंबई-ठाणे येथील हिरानंदनी इंटरनॅशनल स्कूलमध्ये सातवीमध्ये शिकत आहे. लहानपणापासूनच तिला आईस स्केटिंगची आवड होती. ती सध्या ठाणे येथील राईसा क्लबमध्ये प्रशिक्षण घेत आहे. यासाठी तिला देशातील स्केटिंगचे प्रसिद्ध प्रशिक्षक राहुल पंदीरकर आणि तिची आई रिना शेटे-परब यांचे मार्गदर्शन मिळत आहे. ओवीने याआधी विविध स्पर्धांमध्ये अजिंक्यपदे मिळविली आहेत. ओवी ही गुहागर येथील प्रसिद्ध उद्योजक आणि सामाजिक कार्यकर्ते सुरेश शेटे, तसेच मसुरे चांदेरे आणि कुर्ला बैलबाजार येथील समाजसेवक बाबा परब यांची ती नात आहे. प्रशिक्षक पंदीरकर यांनी स्पर्धेदरम्यान सर्व स्केटिंग खेळाडूंना मार्गदर्शन केले. ओवीच्या नेत्रदीपक यशाबद्दल तिचे सर्वत्र कौतुक होत आहे. मसुरे, चांदेरवाडी गावासाठी सुद्धा तिचे यश अभिमानास्पद आहे.