कणकवलीत आज ‘हिंदी सक्ती’ची होळी

कणकवलीत आज
‘हिंदी सक्ती’ची होळी
कणकवली : महायुती सरकारने महाराष्ट्र राज्यात हिंदी सक्तीचा निर्णय काढला असून त्याद्वारे महाराष्ट्रातील मराठी भाषेचे महत्त्व कमी करण्याचा प्रयत्न केला जात आहे. असा आरोप करीत हिंदी सक्तीविरोधात आवाज उठविण्यासाठी तालुका ठाकरे शिवसेनेतर्फे उद्या (ता. ३०) सकाळी ११ वाजता कणकवली पटवर्धन चौकात हिंदी सक्तीच्या शासन निर्णयाची होळी करण्यात येणार आहे. माजी आमदार वैभव नाईक, परशुराम उपरकर, राजन तेली, जिल्हाप्रमुख संदेश पारकर, कणकवली विधानसभा प्रमुख सतीश सावंत, महिला जिल्हाप्रमुख नीलम पालव, युवासेना जिल्हाप्रमुख सुशांत नाईक आदी उपस्थित राहणार आहेत. उपस्थित राहण्याचे आवाहन शिवसेना तालुकाप्रमुख कन्हैय्या पारकर आणि प्रथमेश सावंत यांनी केले आहे.
----------------
देवगडात गुरुवारी
गुणगौरव सोहळा
देवगड : ठाकरे शिवसेनेतर्फे गुरुवारी (ता. ३) सकाळी १० वाजता येथील इंद्रप्रस्थ हॉलमध्ये देवगड तालुक्यातील दहावी परीक्षेत विद्यालयांतून उत्तीर्ण झालेल्या प्रथम तीन क्रमांकांचा सत्कार समारंभ आयोजित केला आहे. हा कार्यक्रम ठाकरे युवासेनेचे जिल्हाप्रमुख सुशांत नाईक यांच्यातर्फे आयोजित केला आहे. ठाकरे गटाचे जिल्हाप्रमुख संदेश पारकर, विधानसभा संपर्कप्रमुख अतुल रावराणे, विधानसभा प्रमुख सतीश सावंत, युवासेना जिल्हाप्रमुख नाईक, महिला जिल्हाप्रमुख नीलम पालव-सावंत यांच्यासह उपजिल्हाप्रमुख यदू ठाकूर, युवासेना उपजिल्हाप्रमुख निनाद देशपांडे, महिला आघाडी उपजिल्हाप्रमुख पूर्वा सावंत, प्रतीक्षा साटम, तालुकाप्रमुख रवींद्र जोगल, जयेश नर, युवासेना तालुकाप्रमुख गणेश गावकर, महिला आघाडी तालुकाप्रमुख हर्षा ठाकूर, उपतालुकाप्रमुख दादा सावंत, प्रमोद वळंजू, दत्ताराम तिर्लोटकर, दत्तप्रसाद (तुषार) धुरी आदी पदाधिकारी उपस्थित राहणार आहेत.
------------------
वर्दे ग्रामपंचायतीत
उद्या कृषी दिन
कुडाळ : कृषी विभाग, कुडाळ पंचायत समिती व वर्दे ग्रामपंचायतीच्या संयुक्त विद्यमाने माजी मुख्यमंत्री तथा हरितक्रांतीचे प्रणेते (कै.) वसंतराव नाईक जयंतीनिमित्त मंगळवारी (ता. १) सकाळी १०.३० वाजता वर्दे ग्रामपंचायत येथे कृषी दिन-शेतकरी मेळावा आयोजित केला आहे. कुडाळ गटविकास अधिकारी अरुण चव्हाण, सहायक गटविकास अधिकारी प्रफुल्ल वालावलकर, तालुका कृषी अधिकारी भास्कर चौगले, वर्दे सरपंच महादेव पालव व उपसरपंच प्रदीप सावंत उपस्थित राहणार आहेत. शेतकऱ्यांनी मोठ्या संख्येने उपस्थित राहावे, असे आवाहन केले आहे.