पोफळी शाळेत मतदान जागृती

पोफळी शाळेत
मतदान जागृती
चिपळूण ः दापोली प्राथमिक शाळेत विद्यार्थ्यांना मतदानाविषयी माहिती मिळावी, तसेच त्यांच्यात जागरूकता निर्माण होण्यासाठी शाळेत प्रत्यक्ष मतदान प्रक्रिया राबवण्यात आली. निवडणुकीसाठी चौथीतील बारा विद्यार्थी उमेदवार म्हणून उभे राहिले होते. प्रत्येक उमेदवाराला चिन्ह देण्यात आले होते. उमेदवारांनी प्रचारही केला तसेच या निवडणुकीसाठी मतपत्रिकाही छापण्यात आल्या होत्या. आपल्या आवडत्या उमेदवाराच्या नावासमोर शिक्का मारून विद्यार्थ्यांनी गुप्त पद्धतीने मतदान केले. या निवडणुकीत चौथीतील पियूष गुळवे व लिबा शेख या उमेदवारांना सर्वाधिक मते मिळाली. त्यामुळे ते या वर्षातील शाळेचे विद्यार्थी प्रतिनिधी ठरले. मुख्याध्यापक महेंद्र कापडी यांच्या मार्गदर्शनाखाली शालेय समितीचे सदस्य अभय चितळे, माध्यमिक विभागाच्या मुख्याध्यापिका स्वप्नाली पाटील, शिशुविहारच्या विभागप्रमुख सुप्रिया वारे उपस्थित होत्या.
-----------
रोटरी क्लबतर्फे
सॅनिटरी नॅपकीन भेट
चिपळूण ः येथील डीबीजे कनिष्ठ महाविद्यालयाच्या महिला विकास कक्ष विभागासाठी चिपळूण येथील रोटरी क्लबतर्फे महाविद्यालयीन विद्यार्थिनींसाठी सॅनिटरी नॅपकीन भेट देण्यात आले. यावेळी नवकोंकण एज्युकेशन सोसायटीचे चेअरमन मंगेश तांबे, नियामक समितीचे सदस्य अविनाश जोशी, निरंजन रेडीज, नीलेश भुरण, महाविद्यालयाचे प्राचार्य डॉ. माधव बापट, रोटरी क्लब चिपळूणचे प्रेसिडेंट अविनाश पालशेतकर उपस्थित होते.
-----------
युनायटेड गुरुकुलमध्ये
निवासी वर्गाचा प्रारंभ
चिपळूण ः परशुराम एज्युकेशन सोसायटीच्या युनायटेड इंग्लिश स्कूलमधील गुरुकुल विभागात पाचवी ते दहावीमधील विद्यार्थ्यांचा वर्षारंभ कार्यक्रम झाला. गुरुकुलात आयोजित केलेल्या वर्षभरातील पहिल्या निवासीवर्गाची सुरुवात वर्षारंभ उपासनेने झाली. गुरुकुलात होणाऱ्या विविध व्यक्तिमत्त्व विकसनकेंद्री उपक्रमांची माहिती देण्यात आली. या कार्यक्रमासाठी शशिकांत वहाळकर उपस्थित होते तसेच निवासी शिबिरातील सहभागी पाचवी ते आठवीच्या मुलांना राख्या तयार करण्याचे प्रात्यक्षिकही देण्यात आले. एकदिवसीय निवास शिबिराची सांगता उपासना, प्रार्थना, व्यायाम व आढावासत्राने झाली.

--------