शाळाबाह्य मुलांना शिक्षणाच्या प्रवाहात आणणार

शाळाबाह्य मुलांना शिक्षणाच्या प्रवाहात आणणार

शिक्षणाधिकारी नाईक ः आजपासून शोधमोहीम, घरोघरी सर्वेक्षण करणार

सकाळ वृत्तसेवा
सिंधुदुर्गनगरी, ता. ३० ः जिल्ह्यातील ६ ते १८ वयोगटातील शाळाबाह्य, अनियमित आणि स्थलांतरित मुलांना शिक्षणाच्या प्रवाहात आणण्यासाठी शिक्षण विभागाकडून शाळाबाह्य मुलांची विशेष शोधमोहीम उद्या (ता.१) पासून हाती घेण्यात येणार आहे. ही मोहीम १५ तारीखपर्यंत राबविली जाणार आहे. मोहिमेंतर्गत शाळाबाह्य विद्यार्थ्‍यांचा शोध घेऊन त्यांना शिक्षणाच्या प्रवाहात आणण्याच्या उद्दिष्टांची माहिती प्रभारी प्राथमिक शिक्षणाधिकारी नीलिमा नाईक यांनी दिली.
जिल्ह्यात प्राथमिक समग्र शिक्षा कार्यक्रमाची तसेच प्रगत शैक्षणिक महाराष्ट्रअंतर्गत ज्ञानरचनावादी शाळा, कृतीयुक्त अध्ययन पद्धती, डिजिटल शाळा, आयएसओ मानांकन, मोफत पाठ्यपुस्तक, गणवेश, मध्यान्ह भोजन, विविध शिष्यवृत्ती परीक्षांची तयारी, नवोदय परीक्षा तयारी अशा प्रभावी उपक्रमांची अंमलबजावणी अनुभवी व तज्‍ज्ञ शिक्षकांमार्फत शाळांमध्ये सुरू आहे. मात्र, सरकारच्या अनेक योजना सुरू असतानाही अद्याप काही बालके शाळाबाह्य असल्याचे निदर्शनास येत आहेत. अशा बालकांना शिक्षणाच्या प्रवाहात आणण्यासाठी शाळाबाह्य मुलांचा शोध घेऊन त्या मुलांना शिक्षणाच्या प्रवाहात आणण्यासाठी शोधमोहीम राबविण्यात येणार आहे. या मोहिमेत घरोघरी जाऊन शाळाबाह्य मुलांचे सर्वेक्षण करण्याव्यतिरिक्त बसस्थानक, रेल्वेस्थानक, बाजारपेठ, वीटभट्ट्या, दगडखाणी, कारखाने, स्थलांतरित कुटुंबे, जिल्ह्यातील सर्व खेडी, गाव, वाडी, तांडे, पाडे, शेतमळे, जंगल, बालगृह, निरीक्षणगृह, विशेष दत्तक संस्था आदी ठिकाणी जाऊन शाळाबाह्य विद्यार्थ्यांच्या नोंदी करण्याबाबत स्पष्ट करण्यात आले आहे. शाळाबाह्य मुलांच्या विशेष शोध मोहिमेंतर्गत ६ ते १८ वर्षे वयोगटातील शाळाबाह्य बालकांचा शोध घेण्यात येणार आहे. या कालावधीत नागरिकांनी सहकार्य करावे, असे आवाहन नाईक यांनी केले आहे.
------------
गतवर्षी आढळली ६ मुले
गेल्या वर्षी ५ ते २० जुलै २०२४ या कालावधीत राबविण्यात आलेल्या शाळाबाह्य मुलांच्या शोध मोहिमेत ६ शाळाबाह्य मुले आढळून आली होती. त्यांना शाळेत दाखल करून शिक्षणाच्या प्रवाहात आणण्यात आले होते.