‘एआय’ युगात विविध क्षेत्रांमध्ये संधी

74197

‘एआय’ युगात विविध क्षेत्रांमध्ये संधी

अरविंद वळंजू ः ओरोसमध्ये निवृत्त बौद्ध पतसंस्थेतर्फे गुणगौरव

सकाळ वृत्तसेवा
सावंतवाडी, ता. ३० ः सध्याचे युग हे ‘एआय’चे युग आहे. या युगात विविध क्षेत्रे खुली होत आहेत, तेवढीच स्पर्धाही वाढत आहे. या स्पर्धेत टिकायचे असेल तर आपल्या आवडीचे क्षेत्र निवडून त्यात यशस्वी व्हा, असे आवाहन तथागत नागरिक पतसंस्थेचे अध्यक्ष तथा सेवानिवृत्त उपजिल्हाधिकारी अरविंद वळंजू यांनी ओरोस येथे केले.
निवृत्त बौद्ध अधिकारी कर्मचारी संस्था, सिंधुदुर्गतर्फे शनिवारी (ता. २८) बौद्ध समाजातील गुणवंत विद्यार्थ्यांचा गुणगौरव ओरोस येथील डॉ. बाबासाहेब आंबेडकर सामाजिक न्याय भवन सभागृहात आयोजित करण्यात आला. त्यावेळी ते बोलत होते. कार्यक्रमाच्या अध्यक्षस्थानी संस्थेचे अध्यक्ष सूर्यकांत कदम होते. कार्यक्रमाची सुरुवात प्रतिमापूजन व सामुदायिक बुद्ध वंदनेने करण्यात आली. आनंद धामापूरकर यांनी उद्देशिकेचे सामुदायिक वाचन केले. ममता जाधव यांनी बुद्ध गीताने स्वागत केले. मोहन जाधव यांनी प्रास्ताविक केले. यावेळी वळंजू यांनी, विद्यार्थ्यांनी आपली आवड, क्षमता आणि आर्थिक बाजू याचे भान ठेवून करिअर निवडावे, असे आवाहन केले.
यावेळी संस्थेचे रमेश कदम, रुपाली पेंडूरकर, पालक संजय पाटील, प्रा. धारपवार, विद्यार्थिनी आर्या कदम, साक्षी कदम, आर्या जाधव आदींनी मनोगत व्यक्त करून सत्काराबाबत कृतज्ञता व्यक्त केली. कार्यक्रमाचे सूत्रसंचालन श्रद्धा कदम व ममता जाधव यांनी केले. आभार आनंद धमापूरकर यांनी मानले. यावेळी जिल्ह्यातील संस्थेचे पदाधिकारी, गुणवंत विद्यार्थी व पालक मोठ्या संख्येने उपस्थित होते.
---
पाच-सहा वर्षांत सेवाभावी उपक्रम
अध्यक्ष कदम म्हणाले, ‘‘ही संस्था निवृत्त झालेल्यांची जरी असली तरी संस्थेचे काम व्यापक असून तळागाळात पोचून सामान्यांचा विकास करणे, हेच उद्दिष्ट आहे. संस्थेने गेल्या पाच-सहा वर्षांत विविध सेवाभावी उपक्रम राबवून समाजात आपले वेगळे स्थान निर्माण केले आहे. त्याचाच एक भाग म्हणून म्हणजे तथागत नागरिक पतसंस्था ही निर्माण करून समाजात एक आर्थिक स्रोत निर्माण करण्याचे काम करण्यात आले आहे. या पतसंस्थेचे पत वाढवण्याचे काम समाजाने करावे.’’