तिलारी धरणामधून उद्या पाण्याचा विसर्ग

तिलारी धरणामधून
उद्या पाण्याचा विसर्ग

सकाळ वृत्तसेवा
दोडामार्ग, ता. ३० : तिलारी धरणाच्या पाणलोट क्षेत्रामध्ये अतिपर्जन्यवृष्टी होत असल्याने तिलारी धरणाच्या जलाशयात झपाट्याने वाढ होत आहे. सध्या ७० टक्के क्षमतेने पाणी धरणात भरले आहे. त्यामुळे बुधवारी (ता. २) तिलारी नदीला अतिरिक्त पाणी सोडण्यात येणार आहे.
नदीकाठच्या गावांनी सतर्कता बाळगून कोणीही पाण्यात उतरू नये, असे आवाहन तिलारी पाटबंधारे प्रकल्पाचे कार्यकारी अभियंता विनायक जाधव यांनी प्रसिद्धी पत्रकाद्वारे केले आहे. पत्रकात म्हटले आहे की, तिलारी धरणाच्या पाणलोट क्षेत्रात मोठ्या प्रमाणात पाऊस पडत आहे. त्यामुळे धरणाच्या पाणीसाठ्यात झपाट्याने वाढ होताना दिसत आहे. तालुक्यात २५ जूनपासून सतत पडणाऱ्या पावसामुळे जलाशयाच्या पाणीसाठ्यात वाढ झाली आहे. धरण ७० टक्के भरले आहे. दिवसाला तीन टक्के पाणी धरणाच्या जलाशयात भरत आहे. धरण ७८ टक्के भरल्यावर हे पाणी नियंत्रित करण्यासाठी पुच्छ कलव्याद्वारे तिलारी नदीत सोडण्यात येणार आहे. तिलारी नदीकाठच्या गावांनी सतर्कता बाळगावी व शेतीची कामे करताना पाण्यात कोणीही उतरू नये. महिलांनी नदीत कपडे धुण्यासाठी जाऊ नये, असे आवाहन केले आहे.