तळेरे विद्यालयात ‘स्किल ऑन व्हील’

74222

तळेरे विद्यालयात ‘स्किल ऑन व्हील’

भगीरथ प्रतिष्ठानचा उपक्रम; ग्रामीण शाळा स्वयंपूर्ण बनविण्याचा उद्देश

सकाळ वृत्तसेवा
तळेरे, ता. ३० : विद्यार्थ्यांना शैक्षणिक अभ्यासक्रमासह विविध कला-कौशल्ये आत्मसात असतील तर ते कोणत्याही क्षेत्रात कमी पडणार नाहीत. हा विद्यार्थीहिताचा हेतू समोर ठेवून येथील वामनराव महाडिक माध्यमिक विद्यालय व कनिष्ठ महाविद्यालयात यावर्षीपासून ‘स्किल ऑन व्हील’ उपक्रम सुरू केला आहे.
या अभ्यासक्रमाच्या उद्‍घाटनप्रसंगी हा अभ्यासक्रम सिंधुदुर्गात यशस्वीरित्या सुरू राहण्यासाठी पालकत्व स्वीकारलेले प्रसाद देवधर, शेखर सामंत, डॉ. मिलिंद कुलकर्णी, अभ्यासक्रमाचे जिल्हा समन्वयक सूचित भोगले, तळेरे सरपंच हनुमंत तळेकर, माजी सरपंच चंद्रकांत तळेकर, शशांक तळेकर, उदय दुधवडकर, माईंड ट्रेनर सदाशिव पांचाळ, श्रावणी कॉम्प्युटरचे संचालक सतीश मदभावे, शाळा समिती सदस्य शरद वायंगणकर, नीलेश सोरप, प्राचार्य अविनाश मांजरेकर आदी उपस्थित होते.
कार्यक्रमाच्या प्रास्ताविकात प्रा. अविनाश मांजरेकर यांनी अभ्यासक्रमाची थोडक्यात रुपरेषा सांगितली. देवधर, सामंत, डॉ. कुलकर्णी यांनी या अभ्यासक्रमाचे महत्त्व तसेच कौशल्याची असणारी आवश्यकता आपल्या मनोगतातून व्यक्त केली.
ग्रामीण भागातील अनेक युवक-युवती शिक्षण, रोजगार व मार्गदर्शन या संधींपासून दूर राहतात. ही दरी भरून काढण्यासाठी भगीरथ प्रतिष्ठान या सामाजिक संस्थेने व ‘कॉज टू कनेक्ट या फाउंडेशन’ने ‘स्किल ऑन व्हील’ हा अभिनव उपक्रम सुरू केला आहे. शिक्षण व कौशल्य प्रशिक्षण ग्रामीण भागातल्या शाळांपर्यंत नेणे, ग्रामीण युवकांना स्वयंपूर्ण व आत्मनिर्भर बनवणे, रोजगारक्षम बनवणे हे या उपक्रमाचे उद्दिष्ट आहे. यामध्ये एक आधुनिक तंत्रज्ञानाने सज्ज मोबाईल व्हॅन असून त्यामध्ये प्रशिक्षणासाठीच्या अनेक वस्तू उपलब्ध करण्यात आल्या आहेत. तसेच या अभ्यासक्रमासाठी कमलेश बिडये व कासले हे दोन प्रशिक्षक नेमण्यात आलेले आहेत. हा कार्यक्रम प्रशालेच्या डॉ. एम. डी. देसाई सांस्कृतिक भवनात पार पडला. कार्यक्रमाचे सूत्रसंचालन व आभार प्रदर्शन सहायक शिक्षिका सुचिता सुर्वे यांनी मानले.