राजापूर ः गणेशमुर्ती बनविण्याच्या साहित्यांचे दर वधारले

rat७p१५.jpg , rat७p१६.jpg -
७५९५१, ७५९५०
राजापूर ः गणेश कार्यशाळेमध्ये तयार करण्यात आलेल्या शाडूच्या गणेशमूर्ती.
-----------
गणेशमूर्ती निर्मितीच्या साहित्यांचे दर वधारले
२० ते २५ टक्के वाढ; गणेशोत्सवाला महागाईची झळ
सकाळ वृत्तसेवा
राजापूर, ता. ७ ः आराध्य दैवत असलेल्या गणपती बाप्पांचे आगमन पुढील महिनाअखेरीस होणार आहे. त्यामुळे राजापूरमध्ये गणेशमूर्ती घडवण्यासाठी कार्यशाळांमध्ये आतापासून लगबग सुरू झालेली आहे; मात्र, बाजारपेठेत असलेल्या वाढत्या महागाईमुळे गणेशमूर्ती तयार करण्याच्या साहित्यात सुमारे २० ते २५ टक्क्यांनी वाढ झाली आहे. त्याचा परिणाम मूर्तिकारांसह गणेशभक्तांनाही सहन करावा लागणार आहे.
श्रीगणेशाच्या स्वागतासाठी आरास कशा पद्धतीची आणि कोणती करायची, याचे नियोजन आणि आराखडे बनवले जात आहेत. पुढील महिन्यात घरोघरी गणेशाचे आगमन होणार आहे. त्यामुळे श्री गणेशाची मूर्ती बनवण्यासह त्यांचे रंगकाम करण्याची लगबग गणेशमूर्ती कार्यशाळांमध्ये दिसत आहे.
गणेशमूर्ती बनवण्यासाठी वापरण्यात येत असलेल्या शाडूच्या मातीसह रंग आणि अन्य साहित्यांच्या दरात वाढ झाली आहे. गणेशमूर्ती तयार करण्यासाठी वापरण्यात येत असलेली शाडूची माती कोकणात मिळत नाही. ती गुजरातसह अन्य भागांतून विकत आणावी लागते. सर्वसाधारणपणे ही माती किलोवर खरेदी न करता पोत्यावर केली जात असून, गतवर्षीच्या तुलनेत यावर्षी प्रत्येक पोत्याच्या किमतीमध्ये ३०-३५ रुपये दराने वाढ झाली आहे. त्याबरोबरच वाढलेला वाहतूक खर्च आणि गणेशमूर्ती तयार करण्यासाठी लागणारे अन्य साहित्य यांच्याही किमती वाढल्या आहेत. कारागिरांची वाढलेली मजुरी या परिस्थितीमध्ये गणेश चित्रशाळा चालवणे अनेकांना डोईजड झाले आहे. महागाई वाढल्यामुळे गणेशमूर्तींच्याही किमती वाढणार आहेत. अन्य वस्तूंचे दरही वाढल्यामुळे यावर्षी गणेशभक्तांना वाढत्या महागाईचा सामना करावा लागणार आहे.

दृष्टिक्षेप
* शाडूच्या मातीच्या दरात वाढ
* वाढलेला वाहतूक खर्च
* अन्य साहित्याच्या वाढलेल्या किंमती
* कारागिरांची वाढलेली मजुरी
* रंगांच्या दरांमध्ये वाढ

कोट
पुढील महिन्यात गणेशोत्सव आहे. त्यामुळे गणेशमूर्ती बनवण्याची लगबग सुरू झाली आहे; मात्र शाडूची माती, कारागिरांची मजुरी, रंगाचे दर यामध्ये वाढ झाली आहे. त्याचे परिणाम होणार आहेत.
- राजेश मेस्त्री, मूर्तिकार