राजापुरात पेवर ब्लॉक बसवण्याचे काम सुरू

rat८p१८.jpg-
२५N७६१८८
राजापूर ः पेवर ब्लॉक बसवण्याचे सुरू असलेले काम.

राजापुरात पेवर ब्लॉक बसवणे सुरू
काँग्रेसच्या आंदोलनाला यश ; एसटीसाठी फरपट वाढली
सकाळ वृत्तसेवा
राजापूर, ता. ९ ः शहरातील जकातनाका ते जवाहर चौक या मुख्य रस्त्यावर खड्डे पडलेल्या भागात पेवर ब्लॉक बसवण्याचे काम पालिकेने आजपासून हाती घेतले आहे. हे काम कुशे मेडिकलच्या समोरून सुरू करण्यात आले आहे. जकातनाका ते जवाहरचौक हा शहरातील मुख्य रस्ता असून, सातत्याने लोकांसह वाहनांची या मार्गाने वर्दळ असते; मात्र याच रस्त्यावर ठिकठिकाणी मोठ्याप्रमाणात खड्डे पडलेले आहेत. त्यात कुशे मेडिकलसमोरील भागामध्ये खड्डे पडून रस्त्याची पार दुरवस्था झाली आहे. या विषयावरुन काँग्रेस आणि शिवसेनेच्या पदाधिकाऱ्यांनी पालिकेच्या अधिकाऱ्यांना भेटून धारेवर धरले होते. विकासकामांना विरोध नसून, मुख्य रस्त्यात पेवर ब्लॉक बसवण्याला विरोध असल्याचे सांगितले. तसेच वेळप्रसंगी रास्ता रोको करण्याचाही इशारा दिला होता. राजकीय वातावरणही तापले असतानाच आजपासून पालिकेने पेवर ब्लॉक बसवण्याचे काम हाती घेतल्यामुळे समाधान व्यक्त केले जात आहे. हे काम आणखी दोन दिवस सुरू राहिल असे पालिका प्रशासनाकडून सांगण्यात आले. दरम्यान, नगरपालिकेने पेवर ब्लॉक बसवण्याचे काम हाती घेतल्यानंतर जिल्हा परिषद बांधकाम विभाग कार्यालय ते जवाहरचौक या भागातील वाहतूक थांबवण्यात आली. त्यामुळे जवाहर चौकात येणाऱ्‍या एसटी गाड्या बंद ठेवण्यात आल्या. ग्रामीण भागातील लोकांना एसटी बसेससाठी एसटी डेपोत जावे लागत आहे. त्यासाठी रिक्षा वा खासगी गाड्यांचा आधार घ्यावा लागत आहे. जवाहरचौकात येणाऱ्‍या एसटी गाड्या शुक्रवारी (ता. ११) सायंकाळपर्यंत बंद ठेवण्याचे पत्र नगरपालिकेने एसटी आगारव्यवस्थापकांना दिले आहे.
-