निरवडे येथे शेतकऱ्यांना मोफत रेनकोटचे वाटप

swt1011.jpg
76591
निरवडे ः येथे शेतकऱ्यांना रेनकोटचे वाटप करताना युवराज लखमराजे भोसले, प्रमोद गावडे, निरवडे सरपंच सुहानी गावडे व इतर.

निरवडे येथे शेतकऱ्यांना
मोफत रेनकोटचे वाटप
सकाळ वृत्तसेवा
सावंतवाडी, ता. १०ः सहयोग ग्राम विकास मंडळ माजगाव व श्री समर्थ साटम महाराज सेवा मंडळ निरवडे यांच्यावतीने निरवडे येथील शेतकऱ्यांसाठी रेनकोटचे वाटप करण्यात आले. निरवडे येथील समर्थ साटम महाराज मंदिराच्या सभागृहात हा कार्यक्रम पार पडला.
यावेळी व्यासपीठावर प्रमुख पाहुणे म्हणून युवराज लखमराजे भोसले, सावंतवाडी खरेदी विक्री संघाचे अध्यक्ष प्रमोद गावडे, निरवडे सरपंच सुहानी गावडे, उपसरपंच अर्जुन पेडणेकर, साटम महाराज मंडळाचे अध्यक्ष संजय तानावडे तसेच मंडळाचे पदाधिकारी अध्यक्ष प्रा. दिलिप गोडकर, सचिव राणे, खजिनदार श्री. नंदिहळ्ळी, सहसचिव बाळू धुरी, सदस्य राजेंन्द्र बिर्जे होते.
श्री. गावडे यांनी शेती करणाऱ्या शेतकऱ्यांची संख्या कमी झाल्याबद्दल खंत व्यक्त केली व आपण खरेदी विक्री संघाच्यावतीने शेतकऱ्यांच्या मदतीला सदैव तत्पर असल्याचे सांगितले. सरपंच सौ. गावडे यांनी आपण वेळोवेळी वेगवेगळ्या मंच्यांवरून शेतकऱ्यांच्या समस्या मांडल्या आहेत. चांगली बियाणे, खते शेतकऱ्यांना मिळणे गरजेचे असल्याचे सांगितले. युवराज भोसले यांनी मंडळाच्या सामाजिक कार्याची प्रशंसा करत उपक्रमाचे कौतुक केले. कृत्रिम बुद्धिमत्ता या आधुनिक तंत्रज्ञानाचा वापर शेतीत करावा. तसेच सध्या नजिकच्या गोवा राज्यात शेतीविषयक जे नवीन प्रयोग चालू आहेत ते आपण सिंधुदुर्गातील शेतकऱ्यांसाठी राबवू शकतो, असे सांगितले. आपणही सध्या हे प्रयोग आपल्या शेतात करत आहोत याचा उल्लेख केला. यावेळी निरवडे-मळगाव पंचक्रोशीतील सुमारे शंभर शेतकऱ्यांना मान्यवरांच्या हस्ते रेनकोट वाटप करण्यात आले. हा कार्यक्रम यशस्वी होण्यासाठी श्री साटम महाराज सेवा मंडळाचे अध्यक्ष संजय तानावडे, अमेय तानावडे, भारत मोरजकर तसेच तृप्ती बोंद्रे, विलास गावडे, सतीश तोरसकर यांनी बहुमोल सहकार्य केले.​