जिल्ह्यातील ४२ पैकी १६ प्रकल्प तुडुंब

जिल्ह्यातील ४२ पैकी १६ प्रकल्प तुडुंब
दमदार पाऊस ः सात प्रकल्पांमध्ये ८० टक्केपेक्षा अधिक पाणीसाठा
सकाळ वृत्तसेवा
वैभववाडी, ता. १० ः जिल्ह्यात झालेल्या दमदार पावसामुळे जिल्ह्यातील ४२ प्रकल्पांपैकी १६ प्रकल्प १०० टक्के भरले असून सात प्रकल्पांमध्ये ८० टक्केपेक्षा अधिक पाणीसाठा आहे. काही प्रकल्पांची दुरूस्ती सुरू असल्याने त्यामध्ये पाणीसाठा केलेला नाही.
जिल्ह्यात मोठी दोन, मध्यम तीन आणि लघु ३७ असे एकूण ४२ सिंचन प्रकल्प आहेत. जिल्ह्यात यावर्षी ८ मे पासून पावसाला सुरूवात झाली. त्यानंतर १६ मेपासून जोरदार पाऊस सुरू झाला. २५ मे रोजी जिल्ह्यात मॉन्सून दाखल होऊन २६ ते २७ मे पासून धरणक्षेत्रांतील नद्या दुथडी भरून वाहू लागल्या. त्यामुळे मेमध्येच जिल्ह्यातील अनेक प्रकल्पांमध्ये पाणीसाठा होण्यास सुरूवात झाली. जुनचा पहिल्या आठवड्यात पावसाने प्रमाण काहीसे कमी राहीले. परंतु, त्यानंतर जुन अखेर आणि जुलैच्या पहिल्या आठवड्यात जिल्ह्यात पुन्हा मुसळधार पाऊस झाला. या पावसामुळे जिल्ह्यातील प्रकल्पामध्ये चांगला पाणीसाठा झाला आहे.
जिल्ह्यातील दोडामार्ग तालुक्यातील तिलारी जलविद्युत प्रकल्पात ६४.८१ टक्के तर तिलारी आंतरराज्य प्रकल्पात ८२.६६ टक्के पाणीसाठा झाला आहे. देवधर मध्यम प्रकल्पात ६०.३० टक्के, कोर्ले सातेंडी प्रकल्प १०० टक्के भरला आहे. अरूणा प्रकल्पाचे शिल्लक काम सुरू असल्याने या प्रकल्पात केवळ १०.१२ टक्के पाणीसाठा आहे. तर ३७ लघु प्रकल्पांपैकी शिवडाव, आंबोली, हातेरी, माडखोल, निळेली, सनमटेंब, पावशी, शिरवल, पुळास, हरकुळ, ओसरगाव, ओझरम, तिथवली,लोरे,तरदंळे हे लघु प्रकल्प पुर्णपणे भरले आहेत. जिल्ह्यातील सद्याचा उपयुक्त पाण्याची टक्केवारी ९३.८५ टक्के इतकी आहे. कणकवलीतील देंदोनवाडी प्रकल्पात फक्त १०.२४ पाणीसाठा आहे. स्थानिक लोकांना पर्यायी रस्ता नसल्यामुळे या धरणात पाणीसाठा केलेला नाही. याशिवाय सात प्रकल्पांमध्ये ८० टक्केपेक्षा पाणीसाठा आहे. जिल्ह्यातील प्रकल्पांमधील उपयुक्त पाण्याची टक्केवारी आता ६८.४१ टक्के पर्यत पोहोचली आहे.