बिबट्याच्या हल्ल्यात आरोंद्यात वासरू ठार

बिबट्याच्या हल्ल्यात
आरोंद्यात वासरू ठार
बांदा ः आरोंदा रेडकरवाडी येथील शेतकरी विनायक अर्जुन रेडकर यांच्या घराशेजारील गुरांच्या गोठ्यात रात्री दीडच्या सुमारास बिबट्याने केलेल्या हल्ल्यात वासराचा मृत्यू झाला. घटनेमुळे परिसरात दहशतीचे वातावरण निर्माण झाले आहे. वनविभागाचे प्रकाश रानगिरे, श्री. पडते यांनी पंचनामा केला. उपसरपंच गोविंद केरकर, पंच सदस्य सिद्धेश नाईक आदी उपस्थित होते. वारंवार या हल्ल्याच्या घटना घडत असल्यामुळे गावात भीतीचे वातावरण पसरले आहे. त्यामुळे वन विभागाने तत्काळ वन्य प्राण्यांचा बंदोबस्त करावा, अशी मागणी होत आहे. या घटनेविषयी वन विभागाला निवेदन देणार असल्याचे उपसरपंचांनी सांगितले.
....................
पोईप केंद्रशाळेमध्ये
मोफत वह्या वाटप
मसुरे ः जिल्हा परिषद केंद्रशाळा पोईप क्र. १ येथील सर्व विद्यार्थ्यांसाठी मोफत वह्या वाटप कार्यक्रम गावचे सुपुत्र, उद्योजक महेंद्र पालव यांच्यातर्फे आयोजित केला आहे. यावेळी शाळा व्यवस्थापन समिती अध्यक्ष शिवरामपंत पालव, उपाध्यक्षा मैथिली घाडी, मिलिंद नाईक, मुख्याध्यापक विकास घाडीगावकर, सहायक शिक्षक अश्विनी पांचाळ, नितीन पालव, रिध्दी आंबेरकर, पप्पू घाडीगावकर आदी उपस्थित होते. पोईप ग्रामस्थांनी महेंद्र पालव यांचे आभार व्यक्त केले.
.....................
शिरोड्यात उद्या
रक्तदान शिबिर
वेंगुर्ले ः मुख्यमंत्री देवेंद्र फडणवीस यांच्या वाढदिवसानिमित्त सिंधुदुर्ग भाजपतर्फे महासंकल्प रक्तदान शिबिराचे आयोजन शिरोडा उपजिल्हा रुग्णालय येथे मंगळवारी (ता. २२) सकाळी ९ वाजता केले आहे. या शिबिरानिमित्त नियमित रक्तदान करणाऱ्या ‘निमंत्रित रक्तदात्यांचा’ विशेष सन्मान केला जाणार आहे. शिबिरात सहभागी होण्याचे आवाहन भाजप जिल्हा उपाध्यक्ष प्रसन्न उर्फ बाळू देसाई, तालुकाध्यक्ष विष्णू उर्फ पपू परब यांनी केले आहे.
---
सावंतवाडी येथे
आज शोकसभा
सावंतवाडी ः अखिल भारतीय मराठा महासंघ सावंतवाडी यांच्या माध्यमातून विकास सावंत यांच्या निधनाची शोकसभा उद्या (ता. २१) सायंकाळी ५ वाजता राणी पार्वतीदेवी हायस्कूल येथे आयोजित केली आहे. या शोकसभेला विकासभाई प्रेमींनी उपस्थित राहावे, असे आवाहन अखिल भारतीय मराठा महासंघ सावंतवाडीच्या पदाधिकाऱ्यांनी केले आहे.