कणकवलीत ‘डिजिटल हयात प्रमाणपत्र’

79001

कणकवलीत ‘डिजिटल हयात प्रमाणपत्र’

तहसीलदार ः सत्यापन ॲपद्वारे सुविधेचा लाभ घ्या

सकाळ वृत्तसेवा
कणकवली, ता. २१ : केंद्र शासनपुरस्कृत विविध योजनांच्या लाभार्थ्यांसाठी ‘डिजिटल हयात प्रमाणपत्र’ सुविधा सुरू केली आहे. यात ‘सत्यापन’ अॅपद्वारे लाभार्थ्यांच्या नोंदणीनंतर त्यांचे हयात प्रमाणपत्र ऑनलाइन तयार होणार आहे. याचा लाभ घेण्याचे आवाहन तहसीलदार दीक्षांत देशपांडे यांनी केले.
कणकवली तहसील कार्यालयात ‘सत्यापन’ अॅपच्या नवीन प्रणालीचे प्रात्यक्षिक, तसेच डिजिटल हयात प्रमाणपत्र वितरण कार्यक्रम झाला. त्यामध्ये तहसीलदार दीक्षांत देशपांडे बोलत होते. यावेळी नायब तहसीलदार गंगाराम कोकरे, अव्वल कारकून डी. सी. सिंघनाथ, महसूल सेवक ए. ए. बागवे, महसूल कर्मचारी स्नेहा चव्हाण, प्रिया राजवाडे आदी उपस्थित होते.
श्री. देशपांडे म्‍हणाले, ‘‘इंदिरा गांधी राष्ट्रीय दिव्यांग निवृत्तिवेतन योजना, इंदिरा गांधी राष्ट्रीय विधवा निवृत्तिवेतन योजना आणि इंदिरा गांधी वृद्धापकाळ निवृत्तिवेतन योजनेंतर्गत लाभ घेणाऱ्या लाभार्थ्यांसाठी डिजिटल हयात प्रमाणपत्र ही नवीन सुविधा विकसित केली आहे. तालुक्यात केंद्र पुरस्कृत योजनांच्या ६६८ लाभार्थ्यांनी मार्च-२०२५ अखेर हयात प्रमाणपत्र सादर केले आहे. या योजनेच्या लाभार्थ्यांनी अॅपद्वारे नोंदणी करणे बंधनकारक आहे. या प्रक्रियेसाठी गावातील तलाठी, पोलिसपाटील आणि सामाजिक कार्यकर्त्यांचे सहकार्य घ्यावे.’’
श्री. देशपांडे म्‍हणाले, ‘‘सत्यापन ॲपद्वारे लाभार्थी स्वतःच्या मोबाइलवरून हयात प्रमाणपत्र तयार करू शकतात. हे प्रमाणपत्र केंद्राच्या पोर्टलशी थेट जोडले जाणार आहे. आधार प्रमाणिकरणाचा वापर करून ही प्रक्रिया सुलभ, सुरक्षित आणि पारदर्शक बनविली आहे. लाभार्थी हे प्रमाणपत्र स्वतःच्या मोबाइलवरून, सेतू केंद्र, महा ई-सेवा केंद्र, तलाठी किंवा तहसील कार्यालयाच्या मदतीने तयार करू शकतात.’’