''समाज संवाद-समस्या निवारण'' मेळावा सिंधुदुर्गनगरीत शनिवारी

swt2132.jpg
79061
सावंतवाडी ः येथे पत्रकार परिषदेस उपस्थित महेश परुळेकर, रमाकांत जाधव, अंकुश जाधव व इतर मान्यवर.

‘समाज संवाद-समस्या निवारण’
मेळावा सिंधुदुर्गनगरीत शनिवारी
महेश परुळेकर ः पालकमंत्र्यांची उपस्थिती
सकाळ वृत्तसेवा
सावंतवाडी, ता. २२ ः संविधानिक हितकरिणी महासंघाच्या वतीने शनिवारी (ता. २६) दुपारी २ ते ६ या वेळेत पालकमंत्री नीतेश राणे यांच्या उपस्थितीत ‘समाज संवाद आणि समस्या निवारण मेळाव्या’चे आयोजन केले आहे. सिंधुदुर्गनगरी येथील जिल्हा नियोजन कक्षात शासन आणि प्रशासनाच्या प्रतिनिधींसमवेत हा मेळावा होणार आहे. समाजबांधवांनी आपल्या समस्या लेखी स्वरुपात घेऊन याव्यात, असे आवाहन जिल्हाध्यक्ष महेश परुळेकर यांनी केले आहे. सावंतवाडी येथे आयोजित पत्रकार परिषदेत ते बोलत होते.
अनुसूचित जातीतील लोकांचे अनेक प्रश्न प्रलंबित आहेत. बौद्ध आणि अबौद्ध समाजाचे हे प्रश्न प्रशासनाकडून सुटत नाहीत. त्यामुळे त्यांनी पालकमंत्री राणे यांची भेट घेतली होती. पालकमंत्र्यांच्या सूचनेनंतर हे प्रश्न सुटू शकतात, अशी आशा त्यांना आहे. यामुळेच त्यांच्या जनतादरबाराप्रमाणे शनिवारी हा मेळावा आयोजित केला आहे, असे परुळेकर यांनी सांगितले.
स्मशानभूमी, जातिवाचक गावांची नावे बदलणे, समाजमंदिर उभारण्यासाठी निधी आणि डॉ. बाबासाहेब आंबेडकर भवन जिल्हा स्तरावर व्हावे, अशा मागण्या या मेळाव्यात करण्यात येणार असल्याचे त्यांनी नमूद केले.
कार्याध्यक्ष रमाकांत जाधव यांनी, समाजाचे हित हा संघटनेचा मुख्य हेतू आहे. डॉ. बाबासाहेब आंबेडकरांचा महामंत्र जपण्यासाठी आम्ही एकत्र आलो आहोत. एका झेंड्याखाली एकत्र येण्याचा निर्णय घेतल्याने संविधानिक हितकरिणी महासंघाची संकल्पना पुढे आली असून, जिल्ह्यात मजबूत संघटन निर्माण झाले आहे, असे मत व्यक्त केले.
यावेळी जिल्हा संघटक अंकुश जाधव, महासचिव गौतम खुडकर, उपाध्यक्ष प्रभाकर जाधव, वासुदेव जाधव, शंकर जाधव, सत्यवान तेंडोलकर, विनोद कदम, मंगेश गावकर, मधुकर जाधव आदी उपस्थित होते.